Ларгсса нюжмар кьини МахIачкъалаллал зума-къирагърай цIуну буллалисса Ися Идавсил ( аьлайгьи сcалям) РувхIанийсса центрданийн бавтIун бия Дагъусттаннал чIявусса хъами хъун ифтарданийн.
[dropcap]В[/dropcap]аниха зузиминнал биялсса захIматгу бивхьуну бия лайкьсса даражалийсса даву дуван. БавтIцириннавух бия республикалул культуралул министр Зарема Буттаева, цIуллу-сагъшиву дуруччаврил министр Татьяна Беляева , муфтинал маслихIатчи Айна ( ПатIимат) ХIамзатова, цаймигу министерствардал вакилтал, активисткахъул. Муфтиятрал просвещениялул отделданул хъаннилмур направлениялул хъунмур Загьра Исмяиловал кIицI лавгуна мероприятиялул гьанумур мурад бушиву Дагъусттаннал хъами цачIунмай бувансса, махъругу, дакIругу ца дурну республикалий ххуйсса оьрму дузал булланшиврул.
«Жува ва РувхIанийсса центрданий ккуркки лагавриву дур ца ххуйшиву, шиная шинайн ва центрданул жува цачIунмай буллай буру, Рамазан зурулгу жува цачIун батIару, ххуймуниха, хъинмуниха зунсса гъира-шавкь ххидувай дакIурдиву», – увкуна Айна ХIамзатовал. Татьяна Беляевалгу чIурчIав дурна укунсса мажлисирттал ва мероприятиярттал хъаннил дакIру гъан дуллалишиву, Дагъусттаннал хъаннин рувхIанийсса ххазинарду мудангу хьхьичIунну бушиву. «Ттун дакIнийхтунусса барчаллагь учин ччива Дагъусттаннал Муфтиятрахь ва хасну ПатIимат Заирбаговнахь, рувхIанийсса культура гьаз дуваврил ххуллий дуллалисса даврихлу.
[dropcap]В[/dropcap]а хIакьинусса мероприятиягу гъилишиврул дурцIусса, дакIру ххуйсса инсантурал ххуй дуллалисса дур», – увкуна Зарема Буттаевал. МаслихIатрайсса ихтилатру бувна Дагъусттаннал аьлимтурал-динчитурал. СахIналийн бувккуна нашидру учайсса машгьурсса душругу. Тиккура Дагъусттаннал хъаннил дартIсса арцугу дуллуна РувхIанийсса центр бувансса кумагран. Бусан ливчIунни, суратру рищайсса яргсса фотозонагу хIадур дурну, чIюлу бувну бивкIшиву ва кьини мизит. Байран лайкьсса даражалий тIайла дуккан биялсса хIарачат бивхьушиву Дагъусттаннал районнаясса ва шагьрурдаясса волонтёртуралгу.
