Совет хIукуматгу дирхьуну, колхозру сакин дуллалисса шиннардий Гъумучиял колхозраву зий, захIмат буллай бивкIссар Кьубиял цIасса ятту-хIухчалт. Вайнна миннал цIарду: Аьбдуразакьов Муса, Билалов Ися, ванала арс Мирза, ХIамзалаев ХIамзалав, Жамалуттинов Жамалуттин, МахIаммадов Мирза, ванала уссу Мямма, МахIаммадов МахIаммад-Расул, МахIаммадов СултIи, ванал уссу Абубакар, Хъунабутта.
ЛяличIиссава бивкIссар уссурвал СултIи ва Абубакар, ризкьигу ххаллилну кIулсса пишакартал. Колхозрал правлениялул най унува СултIи ивтссар яттил бригадирну. Зий кIийлку шинал, яттил аьдадгу гьарза хьун дурну, миннуя дучIаймургу ххишала хьун дурссар. СултIил цIа гьаз хьуну диркIссар, райондалул вив дакъассагу, республикалийгу. Мира шиннардий райондалул чулухату ва ккаккан увну ивкIссар Дагцикрал членнугу.
Гьай-гьай, Кьубиял хIухчалтрая ххарину ивкIссар танийсса колхозрал председатель Къитачаевгу, хъиннува рязину ивкIссар яттил удаман, хъуни ссирссилттал заллу, Бугъуннахъал Камилгу. Тай шиннардий СултIил цIа мудангу лархъун диркIссар республикалул ва райондалул хIурматрал улттай.
КIицI лавгсса хIухчалтрая Хъун дяъвилул шиннардий аьрайн лавгссар СултIи ва Абубакар, Билалов Мирза, МахIаммадов Мямма, ХIамзалаев ХIамзалав, Жамалуттинов Жамалуттин, Аьбдуразакьов Муса, цаягу зана къавхьуссар.
Миннавасса ХIамзалаев ХIамзалавл ва Жамалуттинов Жамалуттиннул дяъвилийн гьан хьхьичI кулпатру бувну бивкIссар. ХIамзалавн душ бувну бивкIссар. ХIакьину му, бугьарагу хьуну, цила душ-оьрчIал дянив аякьалий бур. Жамалуттиннун увссар арс, цанагу къаккавксса. Мунан цалла цIагу дирзун диркIссар – Жамалуттин. Пенсиялийнгу увккун, къутандалийн ивзун, цанмасса пукьагу бувну, гикку яхъанай икIайссия. Хар-хавар бакъасса азарданул къашавай хьуну, лавгунни аьпалухьхьун.
Вай кIицI бувми бакъассагу, совет заманнай ялагу Кьубиял хIухчалт зий буссия Гъумучиял колхозраву, Щурпахъал Нажмуттиннул чIумал: ДалхIатов МахIаммад, ванала уссу Щаматилав, арсру Кьурван-МахIаммад, Илияс (хIакьинугу кIиягу зийнма буссар ризкьилуха). Кьубигу, миннал хIухчалтгу хьхьичIвагу кIулсса Нажмуттиннул ДалхIатIов МахIаммад ивтссар яттил бригадирну.
Оьллаарив дувайсса ризкьичитурал байраннай сайки гьарца шинах уккан увайсса ивкIссар МахIаммад халкьуннал хьхьичIун. Гьарца шинахгу ванал бригадалул райондалул вивсса колхозирттаву 1-мур кIантту бугьайсса бивкIссар. Ванан буллуну бивкIссар колхозрал чулуха «Волга» машина. Гъумучиял мюрщи-хъуни ванайн «Жула ДалхIатилав» тIийнма бикIайссия. 2016-ку шинал ванал бивкIулийн чIявусса агьлугу бувкIун буссия.
Оьмахан Вагьабов,
ш. Кьуби
