Дагъусттаннал ХIукуматрал председатель Аьбдулмуслим Аьбдулмуслимовлул каялувшиндарай апрель зурул 12-нний хьу­сса совещаниялий ххал бивгьунни республикалул кIулшивуртту дулаврил идарарттай 3-сса сменартту духлаган даву мурадрай­сса масъалартту.

ОьрчIан 2 сменалий дуклансса шартIру дузал даншиврул, 2024-ку шинайн бияннин республикалий 20 школа бансса арцу итадакьин най дур ва 13 школа бансса идарарттал проектру цIакь дурну дур.

Дагъусттаннал премьер-министрнал кIицI лавгунни АьФ-лул Президентнал 2024-ку шинайн бияннин кIулшивуртту дулаврил идарарттай 3-сса сменартту духлаган даву мурадрайсса тIалавшинна дурсса хIукму бувну бивкIшиву.

Ванал бусаврийн бувну, гьашинусса шинал республикалул 33 школалий оьрчIру дуклай бу­сса бур 3 сменалий.
– Дуклаки оьрчIру гьарза шаврийн бувнугу махъсса 3 шинал лажиндарай школарттай 3 смена хIасул хьуну дур. МуницIун бавхIуну, республикалий ххал бигьлай бур школарттай 3-сса сменартту духлаган даву мурадрайсса ххуллу-чаранну. Махъсса 5 шинал мутталий бувну бур 22 азара дуклаки оьрчIансса кIану бусса 53 школа. Республикалий тамансса школартту бувну бунугу, хIакьинусса кьини биял хъанай бакъар дуклансса кIантту, – увкунни премьер-министрнал.

– Дагъусттаннал БакIчи Сергей Меликовлул Аьрасатнал экономикалул министр Максим Решетниковлущал хьусса хьунабакьаврийгу ххал бивгьуссар школарттай 3-сса сменартту дукьан даврил хIакъиравусса масъалар­тту. ХIакьинусса кьини республикалий буллай буссар 20 школа, ми бувну махъ, 23 школалий 3-сса сменартту дукьан дансса каши хьунтIиссар, – увкунни Аьбдулмуслим Аьбдулмуслимовлул.

Республикалул кIулшивуртту дулаврил идарарттай 3-сса сменартту дукьан даврил хIакъи­равусса масъаларттая балжину бусласисса ихтилат бунни ДР-лул кIулшивуртту дулаврил министр­нан кIанайсса ЯхIия Бучаевлул. Ваналгу исват бунни республикалул 33 школалий оьрчIру 3 сменалий дуклай бушиву.
– ХIакьинусса кьини най ду­ссар 20 школа баврил давуртту. Миннува МахIачкъалалив буллай буссар 10 школа, 3 – Хасавюртуллал райондалий, 2 – Каспийск шагьрулий, Табасараннал, Докъузпариннал, Лаващиял, Ахттиял районнай ва Хасавюрт шагьрулий ца-ца школа, – увкунни ЯхIия Бучаевлул.
Региондалул школарттай 3-сса сменартту духлаган даврицIун дархIусса строительствалул объектирдая бувсунни ДР-лул строительствалул, архитектуралул ва ЖКХ-лул министр Артур Сулаймановлул. Бувсунни ванал цаппара школарттал проектирдал хIакъираву хьунадакьлакьисса захIматшивурттаягу.
КIицI лавгсса масъалалул хIакъиравусса ихтилатру мукунма бунни муниципалитетирттал хъуниминналгу.
Аьбдулмуслим Аьбдулмуслимовлул тапшур бунни строительствалул объектирттал давуртту анавар дуккан дан, личIи бунни объектирттал ялув бацIансса пишакартал.