Апрельданул 22-нний МахIачкъалалив АьФ-лул ХIукуматрал Председательнал хъиривчу Александр Новаклул ва Дагъус­ттаннал БакIчи Сергей Меликовлул каялувшиврий хьунни регион газрал дузал баврил хIакъиравусса батIаву.

Мурадлувсса идарарттал вакилтуращалсса батIаврий бувсунни Дагъусттан газрал дузал баврил Программалул лагрулуву дуван най бушиву сайки 2 азарда километраксса газрал сетьру, газрал дузал дувантIий бушиву сайки 200 шяравалу. «Мукунна бартдигьлайнна дур ттигу догазификациялул программа. ЧIун чансса лирчIун дур. Жулва хьхьичIсса масъала хъана­хъиссар, Аьрасатнал Президентнал тапшурлугъ бартдигьаву мурадрай, шинал ахирданийннин газ гъанну бувцусса циняв шяраваллаву заявкарду дуллуминнал къатравун газ буцаву. «Ттун кIулли му ххуллий тамансса давуртту дурну душиву», – кунни Александр Новаклул. Сергей Меликовлул хъамаллурахь барчаллагь кунни Дагъусттаннал агьали энергетикалул ва ЖКХ-лул хIаллихшинну бартдигьаврил масъаларттах къулагъас даврихлу ва кумаг баврихлу.

Миннал ххал бивгьунни республика 2021-2025-ку шиннардий газрал дузал даврил Программа бартдигьаврил масъала. Ихтилатчитурал бувсунни Программалул лагрулуву дуллалисса давуртту цила чIумал бартдиргьуну душиву. Ми кIул хьунни заявкарду дуллусса ялапарчитурал къатравун газ буцаврил давурттащал.
Александр Новак ва Сергей Меликов вай гьантрай гьур­тту хьунни догазификациялул программалийн бувну МахIач­къалаллал микрорайондалий­сса къатравун газ буцаврил давурттавух.