«Ухссавнил Къапкъаз – 2022: санкциярттал тагьардануву экономика цалий дацIан дувансса чаранну» тIисса площадкалий хьунни му масъалалул хIакъиравусса батIаву. БатIаврий каялувшиву дуллай ия АьФ-лул Президентнал Ухссавнил Къапкъазуллал Федерал Округрайсса вакил Юрий Чайка.
БатIаврий Юрий Чайкал тIимунийну, Аьрасатнал циняв регионнай, хьхьу-кьини къакуну, зий бур санкциярттал биян буллалисса зараллу чан личIан бансса чараннаха.
ДР-лул ХIукуматрал председатель Аьбдулмуслим Аьбдулмуслимовлул, батIаврий махъ лахълай, бувсунни цIанасса ппурттувусса захIматшивуртту духлаган давриву яла хъунмур кIану бугьан аьркиншиву бизнесрал. Мунияту ишбажаранчишиврул сипталуцIун кабакьу баву личIлай бур приоритетми задачарттавасса цану.
– Жу Дагъусттаннай зий буру ишбажаранчитуран бюхъайссаксса хъинсса къулайшивуртту хьун давриха, миннал давурттайн щавщи къабияншиврул. Сакин бувну буссар республикалул экономика цалий дацIан даврин ва лядуккан даврин хасъсса Оператив штаб.
Жунма цинявннан кIулли федерал центрданул цащава шаймур буллай бушиву билаятрал экономикалун кумаг бавриву. МСП-лул субъектирттахьхьун ихтияр дуллуну дур кредитирттал каникуллу дуван, МСП-лул идарартту ххал къабуллан, миннул лицензиярттал чIун лахъи дуккан дуллалаву ва цаймигу хIаллихшиннарду, –увкунни Аьбдулмуслимовлул.
Ишбажаранчишиврул субъектирттан паччахIлугърал чулухасса кумаг баву мурадрай, ДР-лул исполнител властьрал органнал хIадур дурну дур ишбажаранчишивруцIун кабакьаврин хасъсса кIира закондалул проект. Ми дур бизнесран налограл кIушиву чан дувансса проектру. Дур мукунна цаймигу законнал проектру мува мурадрайсса.
Миннуяр ххишалагу, чIиримур ва дянивмур бизнесрансса кумагран федерал даражалий хIукму хьуну бур ишбажаранчитуран хIаллихшинну дусса кредитирттачIансса ххуллу бигьа буван.
Хъунмасса кIану бугьлай бур жагьилсса ишбажаранчитуран буллалисса кумагралгу. Аьрасатнал ХIукуматрал хIукму бувну бур арцуйнусса кумаг буван грантирттал журалий 25 шинавун бияннинсса ишбажаранчитуран. Миннаща бюхълай бур, цалла даву дачин дуваншиврул, ягу даву лядуккан дуваншиврул ласун 100 азарунния 500 азаруннийн диянсса грант.
ХьхьичIра мукунсса грант ласун бюхълай бивкIссар так социал проектирдаха зий бивкIминнаща. Утти арцу итадакьлан тIий бур мюнпатну зузисса лич1и-лич1исса компаниярттан. Мукунсса компаниярттан гьашину личIи дурну дур 3 млн къуруширттал.
