Вай гьантрай Хасавюртлив, Аграрно-экономический колледжраву, хьунни террорданийн къаршисса жагьилтурал форум. Ва сакин дурну дия Дагъусттаннал Террорданийн къаршисса комиссиялул аппаратрал ва Хасавюртуллал администрациялул. Форумрал мурад бия ялун нанисса ник терроризмалул ва экстремизмалул идеологиялия арх даву.
Мероприятиялий гьуртту хьунни Хасавюртуллал бакIчи Хъуругъли Хъуругълиев, Дагъусттаннал БакIчинал кумагчи, Ухссавнил округрайсса Дагъусттаннал Террорданийн къаршисса комиссиялул аппаратрал вакил Карим Бадруттинов, ДР-лул муфтинал кумагчи МухIаммадрасул Саадуев, ДР-лул жагьилтурал министрнал хъиривчу Сиражуттин Галимов, ДР-лул миллатрал политикалул ва диндалул иширттал министрнал хъиривчу Мурад Шафиев, ДР-лул культуралул министрнал хъиривчу Мадина Жаватханова, ДР-лул информациялул ва печатьрал агентствалул хъунаманал хъиривчу Рустам Жалалов, ДР-лул Халкьуннал Мажлисрал депутатътал Руслан Ибрагьимов ва Ризван Галоев, Хасавюртуллал Джума-мизитрал имам Аьли Султанов, жяматийсса организациярдал вакилтал, студентътал. Форумрал даву дайдишин хьхьичI МахIачкъалаллал КIулшивуртту дулаврил управлениялул хъунама Марат Ибрагьимовлул ва ДР-лул физкультуралул ва спортрал министрнал хъиривчу Гайдарбек Гайдарбековлул жагьилтуращал ми оьмуния арх баву мурадрайсса ихтилатру бунни. Форумрал лагрулий колледжраву хьунни Калашниковлул автомат, ппивгу бувну, батIаврил, шашкардал ва шахматирттал бяст-ччал, тIиртIуну дия ДР-лул Спортрал министерствалул музейрал ва «Кавказ» тIисса поисковый отрядрал выставкартту.
Форум тIитIлай, ванил мурадрая бусласисса ихтилат бунни Хъуругъли Хъуругълиевлул.
Украиннаву бивкIсса Дагъусттаннал журналистътал Исрапил Исрапиловлул ва Мурад МахIаммадовлул, Мариуполлаясса лихъачу Эльвира Агъаевал бувсунни дяъви нанисса кIанттурдайсса тагьардания.
