Угьарагу хьуну, азардугу чIяру хьуну, ччя-ччяни агьлай ура азарханардайн. Ва ххуллух на уссияв хъин хъанай «Республиканская больница восстановительного лечения» тIисса кIанттай. Мунийн хьхьичIва учайссия «Грязелечебница» куну. Му буссар Каспийскалийн МахIачкъалалия нанисса ххуллий. Ялун къачIаларчангу, гьартасса хIаятгу дусса, марцIсса, урувгнал я ххари буллалисса азархана бур. ЦIана ва кIура баен бувну бур коронавирусрал ххиличIлурду духлаган дуллалисса идаралийн.
Ва идаралийсса хIакинтуравух бур хIурматрайсса лаккудушру-хъами. Миннувух бур тамансса шинну шикку зий дурсса Исмяилова Асият ва Рамазанова Ирузат.
Асият бур Хъюйннал шяраватусса. Ванил къуртал бувну бур МахIачкъалалив Аскерхановлул цIанийсса медучилище. ЗахIматрал ххуллу байбивхьуну бур фельдшерну зий Каспийскалийсса школа-интернатрай. Ххюра шинава щар хьуну бур Гъумучатусса Шаншаев АьвдурахIиннун. Муния мукьах ва кьура шинал мутталий зий бур кIицI бувсса азарханалий медсестрану.
– Жул коллектив хъинну дусшиву дусса, куннан кув кумаг бувайсса, куннал кув хIурмат бусса коллективри. Хъунама хIакингу гьарца зузалах аякьа дусса, за бувчIусса инсан ур. Мунияту на ттула даврийнгу хъинну ххуйсса дакIнищал бачара. На ттунна хIукуматрал дурсса вихшала щаллу дан хIарачатрай бура. НурмахIаммад Аьбдуллаевич Загайловлул, хъунама хIакиннал, ттул даврин ххуйсса кьимат бищай. Вания тийнмайгу хъиннува ххуйну зунсса хIарачат банна.
Мукунма ва азарханалий медсестрану зузисса Ирузатгу бур хъинну хIал бавкьусса, цилла даву ххаллилну бартдигьлагьисса пишакар. Ва бур Хъусращиял шяраватусса. ХьхьичIва ва зий бивкIун бур акушеркану Краснодардай. Ирузат буслай бур: «Тиха кIура бавсса чIумал, бакIрайва на зий буссияв МахIачкъалаллал ххюлчинмур поликлиникалий акушеркану. Коронавирусрал чIумал, ттуйн оьвкуна ва азарханалий зун. Азар гужну ппив хьуну най дуну тIий «ятIул зонарду» бувссия азарханардай. Ттуятура цIарду къадулланна, амма зун багьссар бацIаву дакъа, коронавирусрал шанма-шанма щатIущал талай. Утти, му инфекция хIура хьувкун, жул азархана му азарданул кьариртсса ххиличIлурдащал талатисса, къашавай ивкIма цала хIалданийн кIура аен уллалисса кIанттуну хьуссар. На цIана зий бура «гальваногрязи» отделениялий медсестрану. ЖучIан азарданул заэв бувсса, хъинну къашавай хьуну бивкIсса агьали букIлай бур. Жу ми хъин буллалиссару. Гьай-гьай, на зузисса отделениялулгу хъуннасса даву дуллалиссар. Аьмну медициналул аралуву на зий бура 26 шинай.
Дагъусттаннал БакIчинал ттун буллуссия Барчаллагьрал чагъар. Муния «Илчилийгу» чивчуну буссия, ва кказит ттун хъинну ххирассар, чигу-чичайссар гьарца шинах».
Хъунмасса барчаллагь, зун, зула даврил усттарсса пишакартал ва гьарцагу чулуха бавкьусса лакку хъамий. Чан къахьуннав зун зуннагу цIуллушиву ва ххаришивуртту.
ХIусайн Давыдов,
ш. ЧIурттащи
