Фермертурал школа къуртал бувминнан дуллунни грантру

Фермертурал школа къуртал бувминнан дуллунни грантру

Вай гьантрай Дагъусттаннал паччахIлугърал аграр университетраву хьунни «Школа фермера» тIисса кIулшиву дулаврил проектраву ххув хьуминнан грантирттансса сертификатру дуллалисса шадлугъ.

Конкурсрал комиссиялул грант дулун лайкьмину личIи унни шама:
Къизлардал райондалиясса Камил МахIаммадов зий ур гъа­ттарал дикIуха, импортозамещениялул шартIирдай «мраморный» журалул гъаттарал дикI итадакьлакьаву хьхьичIуннай дуллай. МахIарамкантуллал райондалиясса Фейзудин Ибрагьимов зий ур багъру бугьавриха, бувгьуну ур ахъулссаннул ва вацIлул ахъулссаннул культурардансса гьанна ххяххан буллалисса питомник.
Бабаюртуллал райондалиясса Камил МахIаммадов зий ур люцерналул гьанна ххяххан бавриха. Грантру дуллалисса шадлугърай гьуртту хьунни ДР-лул шяраваллил хозяйствалул ва дукиялул министрнал хъиривчу Зураб Куччаев, ДР-лул Халкьуннал Мажлисрал депутат, «Опора России» ДРО-лул хъунмур Зульгимар Тагибова-Ричинская, Да­гъусттаннал паччахIлугърал аграр университетрал ректор Зайдин Жамбулатов.

Мероприятиялул модератор ия ва проектрал Россельхозбанкрал чулухасса куратор Намик Аьбдуллаев.
Проектраву гьуртту хъанахъиминнан, цала идарарттай практикагу дуллай, грантирдансса арцугу итадаркьуну дур «Россельхозбанкрал», «Монарх-Д», «Респект» ООО-рдал, «Агрофирма «Татляр» МУП-рал. Вай идарарттал каялувчитал цивппагу бия грантирдансса сертификатру дуллай.

«Школа фермера» проект Россельхозбанкрал щурущи бувну бур хьхьичIунсса аграрный вузирдал ва шяраваллил хозяйствалул идарарттал гьанулий, цачIун дуллай бур шяраваллил хозяйствалул аралуву зунсса пишакартал хIадур бансса министерствалул, регионнал, хъуннасса бизнесрал ва фермертурал каширду.
Школа къуртал бувминнан буллай бур проектрай гьуртту хьусса вузирдал чулухасса паччахIлугърал журалул дипломру. Вайннаща мукунма бюхълай бур Аьрасатнал шяраваллил хозяйствалул министерствалул чулухасса кумагран­сса конкурсирттай гьуртту хьун. Дуккаврихсса арцу дуллай бур Россельхозбанкрал.

Читайте также: