Апрельданул 18-нний ДР-лул ХIукуматрал председатель Аьбдулмуслим Аьбдулмуслимовлул каялувшиврий хьунни республикалул экономикалул лябуккулун хасъсса Оператив штабрал батIаву.

БатIаврий ххал бивгьунни Дагъусттаннал БакIчи Сергей Меликовлул тапшурлугъ бартдигьаврил масъала. Му дур агропромышленностьрал комплекс лябуккан баврил, бизнесран, промышленностьрал идарарттан кумаг баврил хIакъиравусса тапшурлугъ.

Аьбдулмуслим Аьбдулмуслимовлул тапшур бунни региондалий анавар дуккан дуван бизнесран кумагрансса федерал чараннал давуртту.
ДР-лул ХIукуматрал Председательнал тIимунийну, Аьра­сатнал ХIукуматрал чулуха­сса цIусса кумагрансса чаранну хIадур буллай бур бацIаву дакъа.
«Властьрал органнал ца яла агьаммур масъалану хъанахъи­ссар хъус дуккан дайсса идарартту (предприятия) бацIаву дакъа зунсса шартIру дузал даву. Ми шартIру дузал даншиврул федерал центрданул хIадур бувну бур цала-цала отраслирдал чулухасса кумагрансса чаранну, миннувух чIиримур бизнесран кумагранссагу. Утти аьркин­ссар ччясса мутталий хIадур буван федерал даражалий кьамул бувсса актру анаварну щурущи буван республикалийгу, миннул хIакъиравусса информация биян буван ишбажаранчишиврул идарарттайнгу, субъектирттайнгу», – кунни премьернал.

Аьбдулмуслим Аьбдулмуслимовлул гьартану бувсунни ятинсса оьрчIан яхьунсса къатри ласаврил хIакъиравусса Сергей Меликовлул тапшурлугърая.
– Муниципалитетирттал бакIчитуран аьркинссар гьашину июньдалул 1-ннийнин контрактру чичин ятинсса оьрчIру къатрал дузал баншиврул. Ма­съала хъинну агьамсса бур, мунияту му личIисса контрольданийгу бу­ссар, – кунни премьернал.

Яла махъ лавхъунни ДР-лул ХIукуматрал председательнал 1-ма хъиривчу Руслан Аьлиевлул. Мунал тIимунийну, властьрал исполнител органнал каялувчитуран ва районнал ва шагьрурдал бакIчитуран аьркинну бур цаппара арардан (отраслирдан) кумаг баврил федерал чаранну бартбигьаврил ялув бацIаву дуван. Аьра­сатнал ХIукуматрал итадакьин тIий дур 1 млрд къурушрал хIаллихшиннал кредитру ласаврил программалун хасну. Му программалийну компаниярттаща бюхълай бур хIаллихшиннал заемру ласун 3% лувну ва цалчинсса 6 зуруй къалахъан кредитру ва процентру.

КьатIаллил санкциярттал чIумал промышленностьрал идарарттансса кумаграл хIакъираву бувсунни ДР-лул промышленностьрал ва машлул министр Низам Халиловлул.
Интту хъуруннил давуртту нанаврил хIакъираву бувсунни ДР-лул шяраваллил хозяйствалул ва бакIлахъиялул министр Баттал Батталовлул. БатIаврий махъру лавхъунни мукунма цайминналгу.