Ккулув ва Хъусрахь дянивмур даражалул школартту тIитIин­нин райондалул 14 шяраваллил оьрчIал ва душварал дянивсса кIулшиву ларсъссар ЧIяйннал школалий. Вихьлив дянивмур школа тIивтIуна 1960-61-ку дуккаврил шинал.
Мукунма ЧIяйннал школа хъинну лявкъуссар лагмасса районнаясса оьрчIангума (Дахадаевуллал, Агъуллал, РутIуллал ва м.ц.).

На 1957-1960-ку шиннардий 8-10 класс къуртал був­ссар ЧIяйннал школалий. Му ч1умал школалул директорну зий уссия Хъусращатусса ХIусайнаев Абачара, муная махъ уссия ЦIийшатусса МахIаммадов АхIмадпаша. Завучну зий икIайва Ваччатусса Кьурбиев МахIаммад. Интернатрал тарбиячину зий бикIайва аьсатIин душ Вера Красиевна.
АцIилчинмур классру бия 3 – «А», «Б», «В». Ттущал архIал «А» классраву буссия ккалай 38 оьрчI ва душ: СунбатIлия – 10, ЧIяту – 8, Ваччату – 4, 1-мур ЦIувкIрату – 3, 2-мур ЦIувкIрату – 3, Хъювхъату – 3, ЦIийшату – 2, Къяния – 2, Вихьлияту – 1, Хъусращату – 1, Чакъалия – 1. Вайнная 22 аьпалул хьунни.
Ттухьра дарс дирхьусса 14 учительнал сипатругу дакIний дур, цIардугу дакIний дур:

ЧIятусса МахIаммадов ХIу­­сайн (оьрус маз), Каримов МахIаммад (лакку маз), СултIанахIмадов АхIмади (история), ХIажиев Рамазан (биология), Амиров Апанни (химия);
Ваччатусса Сайкуев Ма­хIаммад (география), Давдиева Сарижат (немец маз);
СунбатIлиясса Магьдиев Аьвдуллагь (труд), Мусаев Ися (черчение), Жалилов Ися (астрономия);
Хъусращатусса Кьубачанова Аминат (математика), Авчаев Исмяил (физика);
Ккурклиясса Аьбдуллаев Пятали (физкультура);
Рязаннаясса Ремма Александровна (физика).

СунбатIлиясса Магьдиев Аьвдуллагьлул арсваврал, МахIал ва Тарзаннул, ЧIяйннал школалул хIаятраву дацIан дурну дуссар Хъун дяъвилий ливтIусса учительтурансса ва выпускниктурансса гьайкал.
ЧIяйннал школалий хъинну грамотныйсса, цала дарс ххуйну кIулсса учительталгу, тарбиячиталгу бия. Ца ххуйсса зат цамургу бия: четвертьрал ахирданий нитти-буттахъал собрание датIин классрал каялувчи, завуч, директор, учительтал бучIайва шяравунма. Школалий дуклаки оьрчIал аьмсса собрание датIайва шинал дайдихьулийгу, ахирданийгу. Дарсирдая махъ, цаппара предметирттал (математикалул, оьрус мазрал, химиялул, биологиялул) учительтурал дувайва консультациярду, укра, хIакьгу къаласлай.
ЧIяйннал жямат хасиятрал хIал бавкьусса, ялун буххултращалгу хъинсса буссар. Хъамакъабитай, «Красный партизан» цIа дусса колхозрал къурду хъюруврал бувгьуну бикIайва. Интернатрайгу къабавцIуну, дарсирдая махъ шаппай, ккашилгу хьуну, нанисса оьрчIал жипру хъюруврал дуцIин битайва, аьпа бивухъал, къурайзал Къалабагиналгу, Ххадижатлулгу (Хъюли Ххажул).
ЧIяйннал школалий личIи-личIисса шиннардий зий бивкIссар 9 учитель: Аму­ттинов Михаил, Аьбдуллаев ХIабибуллагь, Гьарунов Анвар, Магьдиев Аьвдуллагь, Мусаев Ися, Жалилов Ися, Амучиев Амучи, АьвдурахIман ва Роза Адамовхъул. СунбатIлиясса 2 оьрчIал– Мусаев Русланнул ва Шагьабуттинов Явсул ларсъссар мусил медаллу.
ЦIана школалул директорну зий бур ХIаммакуева Альбина ХIажинал душ. ХьхьичI ва зий буссия райондалул КIулшиву ласаврил управлениялул хъунмурну.
ЧIа учинну Альбинан цIакь­сса цIуллушиву, давриву шавкь, школалул хъиривсса юбилей дуллансса кьудрат!

МахIмуд Аьлилов,
ш. СунбатIул