Хамискьини, апрель зурул 14-нний, Кировский райондалул администрациялул къатраву хьунни МахIачкъалаллал ва Дарбантуллал районнал дянивсса тIабиаьт дуруччаврил прокуратуралул зузалтрал пресс-конференция.

Журналистътуращал хьунабакьин бувкIун бия МахIачкъалаллал районнал дянивсса тIабиаьт дуруччаврил прокурор, юстициялул хъунама советник Максим Макашов, Дарбантуллал районнал дянивсса тIабиаьт дуруччаврил прокурор, юстициялул советник Михаил Лихачев, МахIачкъалаллал районнал дянивсса тIабиаьт дуруччаврил прокурорнал хъиривчу, юстициялул чIивима советник Максим Лукьянов, МахIачкъалаллал районнал дянивсса тIабиаьт дуруччаврил прокурорнал хъунама кумагчи, 1-мур классрал юрист Юлиана Прокофьева. Хьунабакьаву хьунни Волгалул регионнал дянивсса тIабиаьт дуруччаврил прокуратура сакин хьусса кьинилуцIун дархIуну. 1990-ку шинал апрель зурул 27-нний сакин бувну бур Волгалул регионнал тIабиаьт дуруччаврил прокуратура. Шивун бухлай бур тIабиаьт дуруччаврил хIакъиравусса законну щаллу даврил ялув бацIаву дайсса 19 райондалул дянивсса прокуратура. Вайннал Аьрасатнал 17 субъектрал ялув бацIаву дуллай бур.

Мукьрагу федерал округрай зий, прокуратуралул ххуйсса кка­ккияртту чIалачIи дурну дур.
2021-ку шинал сентябрь зурул 20-нний Волга неххал регионнал дянивсса тIабиаьт дуруччаврил прокуратуралувун бувхссар МахIачкъалаллал ва Дарбанту­ллал районнал дянивсса прокуратурардугу. Вайннул мурад бур Волга неххая Каспий хьхьирийн бияннин экологиялуцIун бавхIусса масъаларттал ялув бацIаву.

ЧIирисса чIумул дянив кIирагу прокуратуралул зузалтрал ххалбигьавуртту дурну, ялун личин бувну бур законну къадурурччусса чIявусса ишру. Масала, Дарбантуллал тIабиаьт дуруччаврил прокуратуралул ххалбигьавуртту дурну, кIул хьуну бур Геджух шяраву ччюрк дичайсса кIанттурду закондалул тIалавшиннардаха лавхьхьуну бакъашиву. Мунил хIакъираву прокурорнал судрайн буллуну бур. Дарбантуллал райондалул судрал райондалул хъуниминная чаран ля­къинсса тIалавшинна дурну дур. МахIачкъалаллал тIабиаьт дуруччаврил прокуратуралул ххалбигьавуртту дурну дур жяматийсса экологиялул организациялул аьрзирайн бувну. КIул хьуну бур Хасавюртуллал райондалийсса вацIлуву мурхьру бичлай бушиву. ВацIлул инспекторнал баччибакъулшиврийну, шикку бивчуну бур личIи-личIисса журалул 334 мурхь.

Ванийн бувну, вацIлул фондран 22 миллиондалия ливчусса зарал хьуну бур. ТIабиаьт дуру­ччаву мурадрай прокуратуралул зузалт хьунабакьлай бур районнал ва шяраваллал бакIчитуращал, агьалинащал, кIул буллай бур регионнайсса масъалартту цукун­сса ва ссацIун бавхIусса буссарив. Зий хъуннасса чIун къаларгнугу, дурсса даву чансса дакъар. ХIакьинусса кьинигу прокуратуралул зузалтрал хьхьичI ххуттайн лавсъсса масъала бур ччюрклил масъала. Ва масъала Дагъусттаннал ХIукуматрал даражалий гьаз бувну бур. Пикри бур цIусса объектру, станциярду ва полигонну бансса.

Журналистътурал гьаз бунни Каспий хьхьиривун канализациярду дачин дурну душиврул, Эльтав вацIлуву мурхьру кьукьлай бушиврул, зунттал неххардивун ччюрк дичлай бушиврул масъалартту.