ОьрчIру – дунияллул тIутIив

ОьрчIру – дунияллул тIутIив

Гъумук Халкьуннал паркрал лултту чулийсса оьрчIал багъ чIярусса шиннардий чIявусса чIивитIухъул тарбия бувсса, оьр­мулул цалчинсса тIитIалардайн ми буцлацисса, бусравсса тарбиячитал, аякьачитал зий бивкIсса ва цIанагу зузисса идара бур.

Шиная шинайн багъран аьркинмур дузал дан, оьрчIан ххуй­сса шартIру сакин дан хIарачат буллай бикIайва райондалий, чIарав бацIайва каши дусса миллатрал вакилталгу. Хаснува, мунил ялув чялиш увкнувасса ур райондалул бакIчи Юсуп МахIаммадов.
Ци бухьурчагу, мюрщи-хъуни къаувкуну, оьрчIру гьарца ишираву итххявхсса, цIанасса тIалавшиннан лавхьхьусса, дурккусса хьун баншиврул хIукуматрал тIалав дуллалисса шартIру му оьрчIал багъраву сакин дан, дуруччин бюхълай бакъая. Аьркинну бия уттизаманнул оьрчIал кюру бан.
ХьхьичIсса шиннардийгу, Юсуп МахIаммадовгу, мунал кумагчиталгу хъирив буклай, Гъумук бан бювхъуна 60 оьрчIансса, 3-6 шинайн бияннинсса оьрчIру занансса, ттизаманнул оьрчIал идара «Солнышко».
Вана утти Гъумучиял Кьакъурув буллай байбивхьуну 120 оьрчIансса хъунмасса багъ. Ттизаманнул къулайшиннарду дусса, гъилисса, чаннасса, кIира зивулийсса вай къатри дан ккаккан дурну дур республикалул инвестициярдал программалул ххуллий.

Гьарзатрал балгусса, мюрщултран лайкьсса кIулшивуртту ва тарбия дулаврил идаралий бикIантIий бур цинма хасъсса, гьартасса дукра дай, дукай кIанттурду, медициналул кабинет, физкультуралул ва музыкалул дарсру дихьлансса хъуни къатри. Гьай-гьай, хъунна­сса къулагъас дикIантIий дур мюхчаншиву дуруччаврил цIанийсса кьай-кьуй дишаврих.
Вагу ца яргсса лишанну хъанай дур республикалулгу, райондалулгу бакIчитал шяраваллил кIанттай ялапар хъанахъисса мюрщи-хъуниминнал оьрмулул шартIру шагьрурдай куннасса хьун дан, ххуй дан хIарачатрай бушиврул. ЦIанасса чIумал оьрчIал багъ баврил давуртту щириркIуну най дур, булувкьуну зий бур строительтал.
ОьрчIал багъ баврил объектрал паспортрай чивчумунийн бувну, вай давуртту, гьашинусса шинал, январь зуруй, дайдирхьуну, вара шинал декабрьданул 31-ннин къуртал дан ккаккан бувну бур.
Даврил заказчикну бур «Дирекция единого Государственного заказчика –застройщика» тIисса ГКУ. Подрядчикну – ООО «Дагсвязьинвест -1».
ЦIанасса бущилий давуртту дачирча, 120 оьрчIансса оьрчIал багъ цила чIумал банссар тIисса умуд бур.
Ва багърал ца ххуйшиву цамургу дикIантIий дур – цIуну бувсса, гьарца аьркинмунил балгусса школалул чIарав бушиву, мунищал дахIаву дуну, школалул оьрмулучIан гъан хьун бюхълай бушиву.
Кабакьиннав, цIуллуну битаннав цинявппагу ва кугьлансса, кьимат лавайсса давриха зузими.

Читайте также: