Апрель зуруй зунттаву цала аьркинмур дугьан анавар буккай шяраваллил агьлу. Амма бугьарасса, цивппалу яхъанахъисса ягу мушакъатсса инсантуран бигьану къабикIай ахъ биххангу, аьркинмур дугьангу. Укунминнан кумагран буккай ЗахIматрал министерствалул социал идарарттал зузалт.
[dropcap]В[/dropcap]ана Ккуллал райондалийгу мукунсса ка-кумаг бунни социал зузалтрал цала аякьалийн лавсъсса 100 инсаннан. Аьмну райондалий социал кумаг бувайсса бур 306 инсаннан.
– Шяраваллил кIанттурдай яхъанахъиминнан ччиссар хъунил парчлуя хайр ласун, нувщи-къур дугьан, ахъ букъавгьуну битан къаххуйрихха. Бугьараминнаща ва мушакъатминнаща бигьану хъанай бакъахьувкун, жу миннан кумагран буккару, ми цала ахъувасса ахънилсса дакъа личIан къабитару, – увкунни райондалул социал идаралул вакилнал.