Апрельданий Ваччиял шяраву хьунни аьпалул вахта. Ва хьунни Культуралул къатрал хIаятравусса «Вирттаврал аллеялий». Вахталий гьуртту хьунни Ваччиял шяраваллил школалул оьрчIру, оьрчIал багърал мюрщулт.

Райондалул бакIчи Шамил Рамазанов хьхьичIну бувкIун бия Ажуб ХIусманов, Анатолий Давдиев, Ветерантурал советрал председатель Аьбдул Загьидиев, Ккуллал ва Лакрал районнал цачIусса аьралий комиссариатрал прапорщик Ажуб Юсупов, идарарттал, культуралул зузалт ва цаймигу тамашачитал.
Цалчин циняв лавгуна Ваччав АхIмад-Хан Султаннул гьайкалданучIа тIутIив дишин. Школалул оьрчIру ларсун най бия дяъвирдал гьурттучитурал суратру. Муния махъ бавтIуна «Вирттаврал аллеялий». Аьпалул вахта тIитIлатIишиву баян бувна СунбатIуллал шяравасса аьралий майор Щамхал Хизриевлул. Гихунмаймур махъ лавхъуна Шамил Рамазановлул. Вахталийн бавтIми барчагу бувну ялун нанисса Ххувшаврил кьинилущал, ванал кIицI лавгуна цукунсса чувшивуртту дурссарив жула чиваркIуннал Хъун дяъвилий ва уттисса данди бацIавурттаву. Махъру лавхъуна мукунма Аьбдул Загьидиевлул, Ажуб Юсуповлул, Асват Чупалаевал. ОьрчIал ккаккан дурна дяъвилул иширттан хас дурсса программа.