АрвахIкьини Гъумук хьунни Аьрасатнал Виричу НурмахIаммад ХIажимахIаммадовлул аьпа абад буллалисса мероприятияртту.
Виричунал цIа дирзунни Лакрал райондалул ОьрчIал ва чIа­важагьилтурал спортшколалун, Аьпалул ултти лачIун дурунни спорт­школалул чIирай ва «Вирттаврал чIирай».

Мероприятие дайдишин хьхьичI шагьрурдая миккун нанисса чIявусса агьлу бивунни Къянив НурмахIаммадлул гьа­ттайн. ХIатталличIа хъамал хьунабакьин Къяннал чиваркIуннащал увкIун ия Ккуллал райондалул бакIчи Шамил Рамазанов.
НурмахIаммад ХIажимахIам­ма­довлул аьпалун хас дурну, МахIачкъалалия Къянив ва Гъумукун бияннин велопробег дурунни «Ночные волки» мотоклубрал вакилтурал. Вайннал бувккуна гьаттай кьулгьу-алхIамгу.
Виричунал аьпа абад буллали­сса мероприятиялий гьуртту хьунни НурмахIаммадлул ппу Энгельс ХIажимахIаммадов, нину Сапижат Мазаева, Дагъусттаннал культуралул министр Зарема Буттаева, ДР-лул Халкьуннал Мажлисрал депутат Марат Илиясов, Пенсионный фондрал хъунама МахIаммад Исяев, Къизилюрт шагьрулул бакIчи МахIаммад МахIаммадов, Ккуллал райондалул бакIчи Шамил Рамазанов, Дагъусттаннал Хъунисриннал советрал хъунаманал хъиривчу Сиражуттин Илиясов, ДР-лул Жяматийсса Палаталул хъунаманал хъиривчу Сапар Аьбдуллаев, Рапи Абакаров, меценат ХIасан Аьлиев ва чIявусса цаймигу.
Мероприятие тIитIлай, Лакрал райондалул бакIчи Юсуп МахIаммадовлул, хIакьину Украиннал аьрщарай хIасул хьусса тагьарданиягу бувсун, кIицI лавгунни Донбасс националистътурацIа марцI буккан буллалисса хасъсса операция байбивхьусса цалчинсса гьантрайва Дагъусттаннайн бувкIшиву жула ватанлув НурмахIаммад ХIажимахIаммадов ивкIусса оьсса хавар.

– Цала канилуминнал оьрмурду ххассал баврил цIаний цайнна цIу ларсун, Аьрасатнал ВДВ-лул гвардейский десантно-штурмовой Ккавкказуллал казачий полкрал 247-мур роталул командир, хъунама лейтенант НурмахIаммад ХIажимахIаммадовлул виричушиврия буслай, жула билаятрал Президент Владимир Путиннул увкунни: «На лаккучура, дагъус­ттанлувра».
НурмахIаммад цаппарасса хIаллай дуклай уссия Гъумучиял лицейраву. Му чIирисса чIумул мутталий ххира хьуну ия учительтурангу, архIал дуклакиминнангу, агьалинангу.
Ганан ххирая лахъшивуртту ритлан, зунттай хьуннав, спортраву хьуннав, къуллугърай хьуннав. Оьрмулул 25 шин хьуннин ванал хъачIунттах дур Сириянавунсса кIира командировка, яла тIурча – Донбассрайсса хасъсса операция, цуксса хIайпнугу, жан дулун багьсса.
Ватан ххирашиву ва виричушиву ванайн ирсирай дирну дур Хъун дяъвилий талай бивкIсса цала ттаттахъая. Яла-ялагу ванансса эбратну хьуну ур ппу Энгельс — шанна Чувшиврул ордендалун ва чIярусса медаллан лайкь хьусса.
Спорт ххирасса ивкIшиву ва бяст-ччаллай хьхьичIунсса ккаккияртту хьун дайсса ивкIшиву хIисаврайн лавсун, райондалул идарарттал коллективирттал батIавурттай ххал бивгьуну, жу хIукму барду Лакрал райондалул оьрчIал ва чIаважагьилтурал спортшколалун дизан НурмахIаммад ХIажимахIаммадовлул цIа, – увкунни Юсуп МахIаммадовлул.
Райондалул бакIчинал ихтилатрая махъ аьпалул улттуя пардав лирккуна Зарема Буттаевал ва НурмахIаммад ХIажимахIаммадовлул буттал ва ниттил. Муния махъ мероприятиялий гьуртту хъанахъиминнал ула лархъсса ч1ирацI дирхьуна тIутIив.
– ХIакьину, Донбассрал агьали нацистътурая буручлай, чIявусса дагъусттанлувтал бур къучагъшиврул ва чувшиврул эбрат ккаккан дуллай. НурмахIаммад ХIажимахIаммадов кунма, ватандалийн дакI тIайласса ва къучагъсса жагьилтурал кIунттихьри жула билаятрал бучIантIимур бусса. Пишакарсса аьраличу, Рязаннал лаваймур аьрали училище къуртал бувсса НурмахIаммад ХIажимахIаммадов ивкIун ур хьхьичIунсса спортсмен. Ванал цIа дирзун махъ Гъумучиял спортшколалий тарбия хъанахъиминнансса жаваблувшинна хъунна хъанахъи­ссар, минная хIакьсса патриотътал, ватан дуруччулт буккантIиссар, – увкунни Зарема Буттаевал.
– ХIурмат бусса Юсуп ХIа­ми­дович! ДакIнийхтуну барчаллагьрай ура ттул арснал Нурма­хIаммадлул аьпа абад буллали­сса давур­ттахлу. Зуйнгу, хъамал, – шиккун батIаврихлу! Ттул арснал Виричушиврия буслай, жула Верховный главнокомандующийнал увкунни: «На лаккучура, да­гъусттанлувра, чачанна, ингушра, аьсатIинна, мордвинна. Вай бюхттулсса махърур. Барчаллагь хьуннав Аьрасатнал Президентнан, ттул арснал виричушиврун бивщусса кьиматрахлу. Аьрасат – бюхттулсса билаятри. Мукун бушиву тасттикь бувссар жула ппухълуннал. Тайннал эбратрай тарбия хъанай ду­ссар хъирив нанисса никгу. Мукун тарбия хьунтIиссар Гъумучиял спортшколалий тарбия хъанахъимигу. ТIайлабацIу баннав миннан дуккавривугу, спортравугу! Яла къагьаннав жула ялату дакьаву! – увкунни Виричунал буттал Энгельс ХIажимахIаммадовлул.
– Лакрал миллатраву мудангу диркIссар чувшиву, къучагъшиву, къирият, дугъришиву, хъамал ххирашиву. Вай цинярда хасиятру дия ттул арснал, НурмахIаммадлул, оьтту-ттурчIавугу. Му тасттикь бантIиссар Гъумучиял школалий ванахь дарс дирхьуминнал, архIал дуклай бивкIминнал, дустурал, цачIу щябикIан, махъ бусан нясив хьуминнал, – увкунни НурмахIаммадлул ниттил Сапижатлул. – Царагу ниттин къабагьаннав духIан укунсса хIасрат! Паракьатну личIаннав аьрщи!
НурмахIаммад ХIажима­хIам­м­адовлул нитти-буттахь виричу тарбия аврихлу, виричунал аьпа абад буллалисса давурттахлу райондалул каялувчитурахь барчаллагь увкунни МахIаммад МахIаммадовлул, Шамил Рамазановлул, Сиражуттин Илиясовлул, Рапи Абакаровлул, Гъумучиял школалул учительница Эльмира Хъунбуттаевал, «Ночные волки» мотоклубрал вакилтурал.
Гъумучиял школалул дук­лаки оьрчIал дурккунни Нур­­махIаммад ХIажимахIам­мадов­лун хас дурсса назмурду.
Мероприятиялийн бувкI­сса хъамаллурайн Юсуп МахIам­мадовлул оьвкуна архIал зума итадакьин Гъумучиял паркравун.