Инт дуркIшиву календарьданулнияр ва кьатIувсса гьаваралнияр ххуйну, яргну бусай чIавахьулттилу чIев-чIев тIий булукьайсса чIелмултрал. Жунма хIисав хъанан бикIай тIабиаьт, утта дурккун, чантI тIий душиву кIинтнил шанювкьусса чIумува. Лелуххантрал макьаннава баллан бикIай интнил хIукъулул такьва. Гьамин, интту, апрель зурул цаннийрихха щалла дунияллийгу Лелуххантрал кьини кIицI лагай­сса. Кьиблалул билаятирттайн левххун лавгсса лелуххант март зурул ахирданий, апрель барз байбивхьукун зана шай. Ккавкхьунссархха, оьрчIрув, зунгу, цал бухьурчагу, низамрай кьюкьа дархIуну, левххун нанисса кьурукьру?

---

Байрандалул тарихрава

Лелуххантран хас дурсса байран дунияллий хьхьичIра-хьхьичI дурну дур 1864-ку шинал Американал Ойл-Сити тIисса шагьрулий. Биологиялул дарсру дишайсса учительницал дурну дур цурдагу. КIанттул кказитирттал му мероприятиялия балжину бувсун бур, яла, му пикри ххуй бивзун, цаймигу лелуххантрал байранну дуллай бавчуну бур Европанаву ва Американаву. Байран ялу-ялун машгьур хьуну дур. 1902-ку шинал Парижлив шяраваллил хозяйствалун аьркинсса лелуххант буруччаву мурадрайсса Дунияллул халкьуннал дянив­сса конвенция цIакь дурну дур. Му конвенциялуцIун бавкьуну бур ацIва билаят. 1906-ку шинал тIурчарив, чIявусса билаятирттал календарьданий Лелуххантрал байран бусраврай цIакь хьуну дур. Щаллагу дунияллий лелуххантрал байран кIицI дуллансса пикри ххуй бивзун бур Аьрасатнангу. ПаччахIнахъал заманнай лелуххант буруччаврил къайгъурдалсса буллай бивкIун бур Аьрасатнал географиялул обществалул. Лелуххантрансса къатри – скворечникру буллан бивкIун бур. 1926-ку шиная шийннай Лелуххантрал кьини хIисаврай аьдатравун дагьну дур. ХIакьинусса кьини чIявусса лелуххант бухлаглай бур дунияллий. Лелуххантрал элму лахьлахьисса орнитологтал бур, лелуххант чан хъанахъаврия экосистемалун хъунмасса зарал буссар тIий. Шиная шинайн тIиссакссагу, хъун хъанай дур ЯтIул луттиравун сияхIрайн ласласисса лелуххантрал сияхI. Сайки гьарца ряххилчинмур лелуххи бухлавгун гьан бюхъайсса лелу­ххун ккаллину бур.

ОьрчIансса хIарпрузандалува

Вяркъу
Вяркъух бургикьай тиккун,
Кьяр-кьяр тIий булукьаву!
Лахъний бавцIурача тIий,
Цуппа цу ххай буривав?

Ису
Исуй, ина циванна,
Дяхтта жун ххал къашайсса?
Тти ина ххал хьуншиврул,
Жу хьхьувай къашанавув?

ХъатIу
ХъатIу шанттуршра шинай
Яхъанай бикIайсса бур,
Ттул хъуннабавагума
Ганияр чIирисса дур.

Ж. Айдамирова