Апрельданул 19-нний Дагъусттаннал БакIчи Сергей Меликов Дарбантлив учIаврил лагрулий дунни «Дарбант шагьрулул территория лядуккан даву» тIисса ДР-лул паччахIлугърал программа бартдигьаврил хIакъиравусса батIаву.
Сергей Меликовлул барчаллагь кунни Дарбантуллал мэрнахь ва мунал командалухь, туристътурал чIумуйн лавайсса даражалий хIадур шаврихлу.
Республикалул каялувчинал хъинчулийсса кьимат бивщунни Дарбант шагьрулул территория лядуккан даврил программа бартдигьаврил давурттан.
Мунал бувсунни му программалул лагрулий цукунсса давуртту дуван ккаккан бувну буссарив ва миннунсса харжлугъран кумаг буллай ушиву меценат Сулайман Керимов.
ХIакьинусса кьини бувну бур 140 оьрчIансса детсад, капитал ремонт дурну дур 4 школалий ва 9 оьрчIал садикрай, 10 школалул площадкартту дакьин дурну дур, бакьин бувну бур 4 кIичIиравалу.
Гьашину пландалий бур бакьин буван 51 кIичIиравалу, дузалшивуртту дуван 5 паркраву, бакьин буван шагьрулул кIичIирттавусса щин экьилагайсса ххуллурду, дакьин дуван кIичIирттал ва ххуллурдал сетьру, щинаххуллурдал ва гъилишиву дачайсса системартту, бакьин буван дуккаврил, культуралул ва спортрал социал объектру.
Сергей Меликовлул тапшур бунни бюджетрал гьарца къуруш ишла дуван цалла ххуллий.
Властьрал органнал дурсса давурттал хIакъираву гьартану бувсунни 1-ма вице-премьер Руслан Аьлиевлул ва Дарбантуллал бакIчи Рустамбаг ПирмахIаммадовлул. Вайннал бувсмунийну, ПаччахIлугърал программа цIакь дурну дур 2025-ку шинайннин, мунил лагру дур 53 млрд къурушру. 2019-2021-ку шиннардий программа бартдигьин личIи дурну дур сайки 10 млрд къурушру.
Цува заллусса инвесторнал арцух бувантIий бур инсантал яхьунсса къатри, административ ва коммерциялул къатри, дукра дукайсса объектру.
Ларгсса шинал бувну бур хъунмасса гостиница, гьашинугу буван тIий бур 3. Бувну бур чIявуквартирартту бусса 7 къатта. Мукунна дурну дур цаймигу давуртту.
ДР-лул строительствалул, архитектуралул ва ЖКХ-лул министр Артур Сулаймановлул бувсунни Дарбантлив щин марцI дуккан дайсса сооруженияртту ва канализацияртту даврил хIакъираву.
