Апрель зурул 12-нний жула паччахIлугърай бюхттулну кIицI лагай Космонавтикалул кьини. Му кьини хъиннура бюхттул дурссар жула лакрал ва Дагъусттаннал цIанихсса вакил, Ххираманал арс Маннаров Мусалгу. Аьламраву Мусал дурссар 1 шин ва 23 ссят. Му бюхттулсса гьунарданухлу Мусан дуллуссар СССР-данул Виричунал цIа, мунал цIагу ларсъссар Гиннеслул рекордирттал луттирайн.

1989-ку шинал гъинттул Муса лахъа-хъунну хьунаавкьуссия Лаккуй, Ккуллал райондалий, СунбатIуллал аьрщарай, «Ххакувалу» тIисса даралуву. Му шадлугърайн бавтIун буссия щархъал жяматру, бувкIун буссия, аьпа биву, Лакрал райкомрал 1-ма секретарь АьвдурахIман ХIусайнов бакIчисса делегация, МахIачкъалалиятусса чIявусса хъамал. Му кьини тачIавгу дакIния къадукканссар.
Муса аьламравун левххун шанма гьантлува на ва назму чирчуссия.

Лехху, Мусай!

Барзул гьава бувайсса
Барзунттал лахъниятур,
Инагу бунни гьава
Гьухъаллал Къалалия.

Лехху, Мусай, ххуллухъин,
Найсса хьурча зуручIан,
Вин тIайлабацIу бивуй,
ЗанаикIу ниттичIан!

Дурив, духьурча, ххал да,
ЦIурттаву лакрал щархъув,
Дуссар тIий къабавнугу,
Лугларчан, лякъинтIиссар.

Ина вила цIанищал
Дагъусттан бюхттул бунни.
ЧIивисса лакрал миллат
Дунияллун кIул бунни.

Аминтахъал Набинал
ТIанкI ссурула куссия,
Лакрал улча бюхттул бан
Гьава инагу бунни!

МахIмуд Аьлилов,
ш. СунбатIул