Дагъусттаннал БакIчи Сергей Меликовлул каялувшиндарай хьунни авгъан дяъвилул ветерантуран, Чернобыллай бивкIминнан ва 1999-ку шинал август-сентябрь зурдардийсса дяъвилул иширттаву гьуртту хьуминнал ялапаршиндарал тагьар къулай даврил хIакъиравусса совещание.

Совещание тIитIлай, Сергей Меликовлул кIицI лавгунни вай цинявппагу, Ватандалул оьвкусса чIумал, оьрмулун нигьачIаву ду­сса захIматсса шартIирдай билаятрал мурадру, агьалинал оьрмурду ва цIуллу-сагъшиву дуручлай бивкIшиву.

– ХIакьину жула жагьилсса аьралитал, виваллил иширттал, мюхчаншиврул органнал, Национал гвардиялул зузалт Украиннавусса аьрали операциялуву гьуртту хъанахъисса чIумал, авгъан дяъвилул ветерантурал, Чернобыллай зий бивкIминнал дур­сса къучагъшиву ляличIинура бусрав хъанай дур, – увкунни Сергей Меликовлул. Ванал дакIнийн бувтунни Авгъаннавусса аьрали иширттаву 4 азарунния ливчусса дагъусттанлувтал гьуртту хьушиву. Миннава 141 инсан зана къавхьушиву. Чернобыллал атомрал электростанция пIякь увкусса чIумал тикку щалагу Совет Союзрая 800 азарунния ливчусса инсантал, миннавух 2,5 азара да­гъусттанчу зий ивкIшивугу.

– ХIукуматрал вай инсантурал багьу-бизу ххуй бан кка­ккан бувну буссия, амма му даву чIярусса шиннардий аьркинсса куццуй дуллай бакъая. Мунийн бувну хIакьину цаппара чаранну лявкъунни кIицI лавгсса инсантуран ка-кумаг бансса. Ххюйлла гьаз дунни аьрали иширттал ветерантуран зуруй дулайсса арцу. Утти миннал ласлантIиссар 10 азарда къуруш. Му бакъассагу, 2005-ку шинал январь зурул 1-ннийн бияннин сияхIрай бавцIусса авгъан дяъвилул ветерантурал ялапаршиндарал шартIру къулай дан, ларгсса шиная байбивхьуну, ххишалану итадакьлай бур 110 миллион арцул. Федерал бюджетрава укун арцу итадакьларча, хъиривсса шинал щаллу бан хьунссия сияхIрай бавцIуну бивкIсса циняв авгъанцынал масъала. Ххал бигьлай буссар 2005-ку шинал январь зурул 1-нния махъ сияхIрай бавцIуминнал масъалагу, – кунни Республикалул БакIчинал.

Мукунма хIакьину хъуннасса къулагъасрайн лавсун бур Чернобыллай бивкIминнан лайкьсса шартIру дузал даврил масъалагу. КIицI лавгунни мукунма 1999-ку шинал халкьуннал ополчентурал кьюкьраву бивкIминнал масъалагу.

Сергей Меликовлул тапшур бунни ДР-лул ХIукуматрал председательнал хъиривчу Мурад Казиевлуйн Украиннай хасъсса аьра­ли операциялуву жанну дуллуминнал аьпа абад баврил масъалалуха зунсса группа сакин бан.

Хъирив ихтилат бувсса ДР-лул захIматрал ва социал иширттал министр АьвдурахIман МахI­мудовлул кIицI лавгунни Авгъан дяъвилул ветерантал къатта-къушлил дузал баврил масъала щаллу хъанай бушиву. 2005-ку шинал январь зурул 1-ннийнин сияхIрай бавцIуну бивкIминнава 2018-ку шинал къатрал дузал увну ур 29 инсан, 2019-ку шинал – 62 , 2020-ку шинал – 83, 2021-ку шинал – 189. Нанисса шинал 249 ветеран дузал ансса пикри бур.
2021-ку шинал Соцзащиталул органнал чаран лявкъунни федерал бюджетрава дирчусса арцух Чернобыллай бивкIминнан кабакьу бансса. Миннан кумагран 55 миллиондалия лирчусса арцу харж дан тIий бур.

Строительствалул, архитектуралул ва ЖКХ-лул министр Артур Сулаймановлул бувсунни 2005-ку шинал январь зурул 1-нния махъ сияхIрай бавцIуми авгъанцынал ялапаршиндарал шартIру къулай данссагу чаран ляхълай бушиву.
1999-ку шинал август-сентябрь зурдардийсса дяъвилул иширттаву гьуртту хьусса ополчентурал хIакъиравусса ихтилат бунни Мурад Казиевлул. Ванал бувсунни ополченталну ккалли баврил хIакъираву бяст-ччаллу багьлай бушиву. Ахирданий Сергей Меликовлул тапшур бунни ДР-лул ХIукуматрайн, кIицI лавгсса масъалартту хIисавравун лавсун, ми щаллу бансса чаранну ляхълан.