Бюхттулсса Ххувшаврил 77 шинал байрандалийнсса хIадуршинна дуллай, Цуссалакрал райондалул администрациялул ва идарарттал зузалт бувккунни субботникрайн. Ва кьини цинявппагу зузалтрал марцI буккан бунни идарарттал лагма-ялттусса кIанттурду ва райцентрданул майдан. ЦIуссалакрал раондалий аьдатрайн бувну, байран дайдишин хьхьичI субботникру баян баврийну, марцIшиврул низам дишаву бакъассагу, агьали кувнначIан кув гъан бувну, цачIун буллай бур.
Ва ххуллух райондалий дуллалисса субботник хас дурну дия Майрал 1-мур ва Ххувшаврил 77 шин шаврил байраннан. Райондалий баян бувсса субботникрайн хъуниминнащал архIал бувккун бия дуклаки оьрчIругу. Вайннал Хасавюртлия ЦIуссалакрал шяравун бияннинсса ххуллийхсса мурхьру кIяла бунни. Идарарттал зузалтрал дурцунни уртту, ххуку бунни кьавкьсса мурхьру ва дуккан дунни ччюрк. ЦIанасса ппурттуву ЦIуссалакрал райондалул щархъаву най дуссар Буттал КIанттул ЦIанийсса Хъун дяъвилул гьурттучитуран дирхьусса гьайкаллу марцI дуккан дуллалисса субботникругу.
Райондалий уттигу Ххувшаврил байран дайдишиннин низамрайн дуцинсса цикссагу давуртту дан лирчIун дур. Гихуннайгу субботникру дуллай миннуха зун тIий бур администрациялул ва идарарттал зузалт.
ЦIуссалакрал райондалул БакIчи МахIаммад-ХIажи Айдиевлул оьвчаву дунни вай давурттавух гьуртту хьуну ччиминнайн.
Райондалул центрну хъанахъисса ЦIуссалакрл шяраву Май зурул 9-нний кIюрххицIунмай тIутIал шалкри бишинтIиссар Хъун дяъвилул гьурттучитурал гьайкалдануцI. Райцентрданул майданнив дантIиссар шадлугърал митинг, культураллул къатрал артистътурал сакин дурсса концерт ва цаймигу мероприятияртту.