Республикалул Культуралул министерствалул ва Халкьуннал творчествалул къатлул сакин дурну, МахIачкъалалив хьунни халкьуннал театрдал «Народная маска» цIанилусса форум-фестиваль. Ва хьунни Аьрасатнал халкьуннал культуралул ирсирал шинал лагрулий ва халкьуннал шаэр Расул ХIамзатовлун 100 шин шаврил таварихран хасну.
«Народный» тIисса цIа цIакь дуллалисса, цивппа ва цIанин лайкьшиву тасттикь буллалисса Республикалул смотрданий гьуртту хьунни жулла республикалул сайки гьарцагу мурцIниясса халкьуннал театрду, вайннувух Лакрал, Ккуллал ва ЦIуссалакрал районнаяссагу.
Халкьуннал театрдал коллективирттал ккаккан бунни Расул ХIамзатовлул произведениярттайн бувсса постановкартту, мукунма агьалинал багьу-бизу, аьдатру ккаккан дуллалисса номердугу. Лакрал райондалул халкьуннал театрданул ккаккан дурна Интнил хьхьунил байрандалул аьдат. Ккуллал райондалул – «Ца кьинилул шанма гьухъа» тIисса цIанилусса, жалиндалун янна дичайсса аьдат.
Коллективирттан кьимат бишлай бия республикалий цIа ларгсса культуралул пишакартурая сакин хьусса жюри.
Фестивальданий гьуртту хьуми лайкь хьуна Культуралул министерствалул чулухасса дипломирттан.
