Вай гьантрай «Дагестанская правда» кказитрал редакциялий хьунни Аьрасатнал ПаччахIлугърал Думалул депутат Артём Бичаевлул журналистътуращалсса хьунабакьаву. Депутатнал ихтилат байбивхьуна Донбасс нацистътурая марцI буккан буллалисса хасъсса операция байбивхьусса цалчинсса гьантрая шиннай цала тикку дуллай ивкIсса даврия.

«На тихун лагаву ттуй бивхьу­сса бурж бакъая, на лавгра ттула хушрай. Аьраличунал кулпатраву хъуна хьусса ттун аьраличунал бурж цирив, му пишалул жапашиву ва жаваблувшинна цукун­сса дуссарив хъинну кIулссар», – увкунни депутатнал.
Ванал бусаврийн бувну, «Единая Россия» партиялул Донбассрай дуллай бур хъуннасса даву. Шикку зий бур мукьва гуманитар центр, яла хъунмур – Мариуполлай. Гуманитар кумаг баву бакъасса, вай центрдал хIакьину биттур буллай бур МФЦ-лул, администрациялул филиаллал буржругу, даврийн уххан, пенсия ласлансса аьрза чичин ва цаймигу суаллу щаллу бан кумаг буллалисса.
«Ттигъанну Мариуполлай Федерациялул Советрал хъунаманал хъиривчу, «Единая Россия» партиялул советрал секретарь Андрей Турчак ва Донецкаллал республикалул бакIчи Денис Пушилин гьурттуну жу тIитIарду 53-мур школа, лавайми классирттал дуклаки оьрчIаща дуккаву къуртал дан бюхъаншиврул. Дуклаки оьрчIал агьаммур суал бия Аьрасатнал лавайсса ва дянивсса дуккаврил идарарттайн дуклан буххаврийн багьайсса. БувчIин бувссар мукунсса каши тайнначIа душиву», – увкунни Артем Бичаевлул.
Депутатнал кIицI лавгунни Донбассрал агьалинал хъунмур нигьачIаву националистал зана бикIавриясса душиву.
«Донбасс – жула агьлур. Ттул лагма-ялттусса инсантурал щилчIав щак бакъассар Аьра­сатнал Президентнал хIукму тIайласса бушиврийн. Ттуща лаласун бюхълай бакъар, цукунни ца инсаннаща миллионну инсантурал бакIрачIан бучIантIимунил жаваблувшинна цайнна ласун бювхъусса. Так танаща дакъа му гьиву духIан къахьунссия».
Агьалинан буллалисса кумаг­рал ялув Артем Бичаевлул бувсунни, гуманитар кумаг бачIлачIисса кIанттай цанма бакIрайн багьшиву «Инсан» фондрал чулухасса кумаг.
«Агьали ттухь фондрая цIухлай байбивхьуна. На аьмну Дагъусттаннаягу, фондрал давриягу бувсукун, Донецкалия МахIачкъалалийн заназисса автобус бакъассарив тIий бия»,– увкунни депутатнал.
Гуманитар кумаг агьалинан биял хъанахъиссарив цIувххукун, Артём Бичаевлул бувсунни кумаг хIакьину тийх хъинну аьркинну бушиву ва ттигу биялсса манзилданий тIайла буклан багьантIий бушиву. Барчаллагь увкунни ва ишираву чIарав бацIлацIисса дагъусттанлувтурахь ва хасну «Инсан» ва «Чистое сердце» фондирттахь.
Республикалийн багьайсса суаллал ялув Артём Бичаевлул бувсунни Дагъусттаннал иширттаву цува ттинингу гьурттуну ивкIшиву.
«2014-ку шиная шихунай на ­уссияв щалагу Аьрасатнал халкьуннал фронтрал Дагъусттаннаясса кураторну. Мунияту кIулли Ккавкказнал буруккинттаяту. ЧIявусса суаллу Дагъусттанная бия Троллейбусирттал паркраву даврил хIакь къабулаврия, бяр Ак-Гёль, вацIа Эльтав ххассал баврийн, Къизлардал коньяк итадакьай заводрал цалалуш бан къабитаврийн багьайсса».
Цала даврия буслай, депутатнал кIицI лавгунни дагъусттанлувтурая чIявусса чагъарду букIлай бушиву зунттал районнай ттукIрайн, медициналул кумаграйн багьайсса, ризкьи куч шайсса кIанттаву школартту бакъашиврийн багьайсса. «Мушакъатсса инсантуран кумаг буллалисса «Жизнь без слез» тIисса жяматийсса организациялул бия дяхтта бацIайсса къатта, къуллугъчитурал бюрократия сававну, бан къахъанахъисса. На муния Дагъусттаннал БакIчи Сергей Меликовлуйн баян байхту, гьантри чIарах къабувккун къатта бансса кIану ккаккан бувуна», – увкунни Артём Бичаевлул.
Ахирданий депутатнал увкунни: «Чичлачияра ттучIан социал сетирдаву зула буруккинттая, чичлачияра ттул кумагчитурачIан, на тачIав цавагу суал чIарах гьан къабитайссар. Миннул ялув на уккайссара министртурайн, муниципалитетирттал хъуниминнайн, федерал властирдал органнайн. ХIакьину на увкIра СМИ-лул вакилтуращал кIул хьун. На республикалул цинявппагу кказитирттал сайтирдайн уххай­ссара, хIатта миллатирттал мазурдийссагума. Вания тихуннай зущалгу дахIаву дикIантIиссар».