Апрель зурул 21-нний МахIачкъалалив Буттал кIанттул цIанийсса Хъунмасса дяъвилий Ххувшаву ларсун 77 шин шаврин хасну хьунни краеведтурал-следопытътурал телевизион кьюкьлул 51-мур республикалул слет ва патриот акция «Вахта памяти».
[dropcap]М[/dropcap]ероприятие МахIачкъалаллал Хъун майданнив дайдирхьунни. Шиккун бавтIун бия Дагъусттаннал ХIукуматрал ва МахIачкъалаллал администрациялул вакилтал, жагьилтурал жяматийсса суккушиннардал активистътал, дуклаки оьрчIру ва кадетътал.
Аьрали оркестрданул рурцусса макьаннахун щалагу колонна дуркIунни Лениннул комсомолданул цIанийсса паркравун, Аьраличунал гьайкалданучIан.
Акциялий гьуртту хьунни Дагъусттаннал БакIчи Сергей Меликовгу.
— Аьдатравун багьсса куццуй, Ххувшаврил байран гъан хъанахъисса гьантрай жува тIитIару ирглийсса Аьпалул вахта. ЧIярусса шиннардил лажиндарай Щалагу Аьрасатнал поисковый суккушиндарал цачIун увну ур цила кьюкьраву Ватандалул къучагъсса тарихрал хIурмат бусса 1000 инсан. ХIакьину, нацистътал цинявппа нигьал буллай сукку хьусса чIумал, Буттал кIанттул цIанийсса Хъунмасса дяъвилий жула халкьуннал ккаккан дурсса къучагъшиврул ва Ватан ххирашиврул кьадру-кьимат хъиннува гьаз хъанай бур.
Дагъусттаннал жагьилтурал чялишсса гьурттушинна дуллай бур Украиннаву нанисса хасъсса операциялуву. Жула оьрчIал къучагъшиву тасттикь дунни Аьрасатнал Виричунал цIанин лайкь хьусса НурмахIаммад ХIажимахIаммадовлул. Укунсса къучагъшивурттайру жува жагьилтал тарбия буллан аьркинсса.
Жагьилтал Ватан ххирану тарбия баву мурадрай хъуннасса даву дуллалиссар ТОКС-рал кьюкьрал. Вайннал экспедициярдал, архиврдащалсса давурттал ялун личин дуллай бур дяъвилий жанну дуллуминнал цIарду. Ва хъуннасса, багьа бищун къашайсса давур. Цаппара гьантрава жура кIицI лагантIиссар жула билаятрай яла агьаммур байран – Ххувшаврил кьини, – увкунни Республикалул БакIчинал.
Акциялул мурад бур Буттал кIанттул цIанийсса Хъунмасса дяъвилий жанну дуллуми дакIнийн бичаву, жагьилтал ватан ххирану тарбия баву.
