АхIвал-хIал къулай бавринсса ка-кумаг

Дагъусттаннал ЗахIматрал ва социал лябуккулул министерствалул биялалийсса республикалул соцзащиталул 52 идаралий чялишну най дур «Социальный контракт» проектраву гьуртту хьун ччисса агьалинал чулухасса аьрзри кьамул баврил ва агьалинан проектраясса бувчIин бавуртту дуллалисса давуртту.

Соцзащиталул идарарттай сакин бувну буссар проектраву гьуртту хьун буллусса аьрзри ххал бигьлансса хасъсса коми­ссия. Гьарица кьини пишакартал буссар агьалинахь «Социальный контракт» проектрал направлениярттая буслай ва муниву гьуртту хьунсса куц бувчIин буллай.
Шиккува кIицI лаган, Да­гъусттаннал БакIчи Сергей Ме­ликовлул республикалул захIматрал министр АьвдурахI­ман МахIмудовлуйн ва муниципал идарарттал каялувчитурайн тапшур бунни социал проектрал чулухуннай хъуннасса къулагъас даву. Республикалул БакIчинал мукунма кIицI лавгунни, санкцияртту баян бувсса, экономикалун захIматсса тагьар дусса ппурттуву, Дагъусттаннал агьалинан ва проект хъуннасса агьамшиву дусса хъанахъишиву.
«ХIукуматрал БакIчинал хъуннасса аякьалийн лавсун бур агьалинал багьу-бизу къулай баврил масъалартту. Социальный контрактрал кумаграйну агьалинаща бюхълай бур цала даву дайдишин, цивппа заллусса предприятияртту тIитIин», – увкунни Сергей Меликовлул.

Социальный контрактрал агьаммур мурадгу хъанахъи­ссар мискинсса кумаграх мюхтажсса агьалинал ахIвал гьаз баву. Прожиточный минимумраяр чансса доходру дусса (11 515 къуруш), социалконтрактраву гьуртту хьусса кулпатирттаща бюхъантIиссар цала даража гьаз бан, мискиншиврува буккан.
КьутIилул шартIирдайн бувну, хIукуматрал арцуйну ва цайми иширттайну кумагру буллай бур миски-гъаривсса кулпатирттан.
Дагъусттаннал БакIчинал хIукмулийн бувну, март зурул 29-ннийн бияннин соцзащиталул идарарттал дурну дур 3345 кьутIи.

Социальный контрактрайх­чIинсса хIукумат­рал чулухасса кабакьаврийну хIакьинусса кьини 1028 кулпатран кумагру бунни. ЧIяруми контрактру дурну дия ательерду, салонну, кондитер цехру, кьай духхаврил ва курьерский службарду тIитIин кумагрансса. Социал контрактраву чялишну гьуртту хьунни МахIачкъала, Хасавюрт ва Дарбант шагьрурдал агьали. Цивппа заллусса хозяйстварду тIитIаву мурадрайсса 818 кьутIи дур. Ва социал контрактрал направлениялувух чялишну гьуртту хьунни ЦIумадиял, МахIарамкантуллал ва Къумтуркъалаллал районнал агьали.
Цала пишалун хасъсса даву лякъаву мурадрайсса соцконтрактру чирчуну дур 251 инсаннал. Ва направлениялувух хъунмурчIин гьуртту хьунни Дагъусттаннал Огнилул, Дарбантуллал ва Сулайман-Стальскаллал районнал агьали. Контрактрал лагрулий, даву ххал даву бакъассагу, кумаг буллай бур цIанасса чIумал тIалавсса пишарду лахьхьин баву мурадрайсса кIулшивуртту дулун. Цинявппагу соцзащиталул идарарттайн бувкIсса инсантуращал зий буссар хасъсса пишакартал.
Соцконтрактрал яла тIалав­мур направление дур инсантал захIматсса тагьарданува буккан бан кумагру буллалисса. Ва чулухуннай чирчуну дур 1249 соцконтракт.
«Социал контрактраву» гьуртту хьун ччиминнаща бюхъайссар Республикалул ЗахI­матрал министерствалул к1антту-к1анттурдайсса соцзащиталул идарарттайн аьрзри булун.