Ажублул арс ХIайдаров Раппани
Хъун бакъасса хIаллай къашавайгу ивкIун, оьрмулул 89 шинаву аьпалухьхьун лавгунни цала оьрмулулгу, захIматралгу ххуллу бусравну бивтсса инсан, Ххюлусматусса Ажублул ва Уммусалиматлул арс Гайдаров Раппани.
Раппани ия чIявучин эбрат ласунну оьрму бутлатисса, цува усса кIану бюхъан байсса, дустал гьарзасса, гьарца ишираву хIал бавкьусса инсан. Ххюлусмав школагу къуртал бувну, зий ивкIссар колхозрал личIи-личIисса давурттай. Армиялул бурж лавхъун махъ, Каспийск шагьрулий «Дагдизель» заводрай зий уссия пенсиялийн укканнин. Заводрай, кутIасса чIумул мутталий кIира-шанна сянатгу лархьхьуну, Раппанинаяту хьуссия хъунмасса цехрал начальник.
Ванан ляличIину ххирая буттал мина, жямат. Шяраваллил агьулданул, зунттаву бикIу, шагьрулий бикIу, ванах вичIи дишайссия. Ва чIявуну гьуртту шайссия жяматрал сакин дурсса цинярдагу давурттавух.
Ванал каялувшиву дурссия Буттал кIанттул цIанийсса Хъунмасса дяъвилия зана къавхьусса вирттаврансса гьайкал дацIан дангу, шяраваллил тарихран хас бувсса лу итабакьингу.
Раппани бусраврай икIайва чIаххув-чIарахначIа, заводрал зузалтрачIа, шагьрулул хъуниминначIа. Ва ия «Наставник молодежи», «Почетный гражданин», «Ветеран труда», ванан дуллуну дуссия чIярусса бахшишругу.
Ванал бувсса захIматгу, тIиртIусса дакIгу, аькьлу-кIулшилийсса ихтилатгу жун мудан дакIний личIантIиссар.
Раппани ахиратрал шаврил пашманшиву кIидачIлай, дакIнийхтунусса жижара буллай буру душваврахь, ссихь, кулпатрахь, душваврал оьрчIахь ва махъсса цинявппагу мачча-гъаннахь.
Раппанинал аьпа баннав, цал рухI хъинний дишиннав, алжаннул ххари аннав.
Ххюлуссуннал жяматрал цIания Арсен Магьдиев
Рамазаннул душ ХIусайнова ПатIимат
Уттигъанну, оьрмулул 82 шинаву, аьпалухьхьун лавгунни 1-мур ЦIувкIратусса ххаллилсса хъамитайпа, захIматрал ветеран, Рамазаннул душ ХIусайнова ПатIимат.
ПатIиматлул щалва оьрму лавгссар цала буттал шяраву колхозрал, ичIаллил, хъу-лухччинул давуртту дуллай. Цуппа кунма захIмат ххирану тарбия бувну бур ванил цила оьрчIругу.
ПатIимат буссия дакI хъинсса, бухху-букку ххирасса, яхI бусса, аьркиннан ка-кумаг бан хIадурсса, лагма-ялттунащал хIал бавкьусса, аькьлу-кIулшилул бувччусса, уздансса хъамитайпа.
ПатIимат ахиратрал хьусса кьурчIишиву кIидачIлай, жижара буллай буру арсурваврахь, душнихь, ссихь, цинявппагу гъан-маччанахь, щалагу агьлу-авладрахь. Имандалий лавгун лякъиннав. Гьав нурданул дуцIиннав. Алжаннул ххари баннав, махънал оьрмурдай барачат бишиннав.
1-мур ЦIувкIуллал жямат
ДакIнийхтуну хъуннасса кьурчIишиву кIидачIлай буру Гульшан Хасаевахь, ванил ххирасса уссу Рамазаннул арс Хаваев Кьурбан дунияллия лагаврийн бувну. Зухьхьунна цIуллушиву дулуннав, махънал оьрмурдай барачат бишиннав, кьурчIишиву лагь дансса ххаришиву ялун дияннав.
Кьурваннул бунагьирттал аьпа баннав, гьав нурданул дуцIиннав, алжаннул ххари аннав.
«Дараччи» фондрал Москавливсса филиал, Москавуллал Дагъусттаннал Культуралул центр
ДакIнийхтунусса жижара буллай буру Рамазаннул душ Хасаева Гульшаннухь, ванил ххирасса уссу Кьурбан аьпалухьхьун лагаврийн бувну. Цал бунагьирттал аьпа баннав, рухI бигьаний дишиннав.
Ваччиял жяматрал цIания Увайсов Давди
