Март зурул 2-нний МахIачкъалалив, Дусшиврул къатраву, хьунни WorldSkills Rossia «Жагьилсса пишакартал» тIисса Региондалул VII-мур чемпионатрал даву къуртал дуллалисса мажлис.
Шикку гьуртту хьунни Дагъусттаннал кIулшивуртту дулаврил ва элмулул министр ЯхIия Бучаев, ДР-лул строительствалул министр Артур Сулайманов, туризмалул министр Эмин Мерданов, ДР-лул цифровой развитиялул министр Юрий ХIамзатов, Строительтурал гильдиялул СКФО-лул хъунама директор Запир Акаев ва республикалул ведомствардал вакилтал.
Чемпионатрал бяст-ччаллаву хьхьичIунсса кIанттурду бувгьусса ва гьурттушинна дурсса жагьилсса пишакартуран бахшишру дуллунни ЯхIия Бучаевлул. Ххув хьуминнан хас дурсса ххаллилсса концертрал программа сакин дурну дия Дагъусттаннал артистътурал ва студентътурал.
ДакIнийн бутанну, февраль зурул 23-28-нний республикалий жагьилтурал дянив най бивкIшиву захIматрал пишардал усттаршиву ккаккан дуллалисса бяст-ччаллу. 55 журасса пишардал магьиршиву ккаккан дуллалисса чемпионатрай гьуртту хьунни республикалул кIулшивуртту дулаврил идарарттаясса 350 оьрчI. Призертал хьунни 194 гьурттучи.
Гьашину чемпионатрал программалул лагрулий цалчин хьунни вебинарду ва онлайн-дискуссияртту. Мунийн бувну, онлайн-режимрайн бувну, гьурттучитураща ва тамашачитураща хIала буххан бювхъунни хьхьичIунсса экспертътурал лавайсса квалификация дусса пишакартал хIадур буллалисса мероприятиярдавух.
Гьуртту хьунни шикку конкурсрал программалувун къабухлахисса регионнаясса вакилталгу. Миннавух бия Татарсттаннал, Ухссавнил Осетиянал, Саха ва Чачаннал республикарттаясса вакилталгу. Регионная бувкIсса хъамаллуран хасну хIадур дурну дия Дагъусттаннал республикалийсса тарихрал гьайкаллу ва цаймигу объектру ххал дувансса культуралул программа.
Чемпионатрай гьуртту хьусса жагьилсса пишакартурал тасттикь бунни цивппа дунияллул стандартирттал тIалавшиннарайн бувсса ларайсса квалификация дусса пишакартал бушиву.
