Дагъусттаннал БакIчи Сергей Меликов гьуртту хьунни Ухссавнил Ккавкказнаву национал мюхчаншиву дуруччаврил хIакъираву хьусса батIаврий. БатIаву хьунни Грозналий АьФ-лул Мюхчаншиврул Советрал Секретарь Николай Патрушевлул каялувшиврий. Ваний гьуртту хьунни АьФ-лул Президентнал Ухссавнил Ккавкказнал федерал округрайсса вакил Юрий Чайка, Минобороналул, ФСБ-лул, МВД-лул, Генпрокуратуралул, МЧС-рал ва Аьрасатнал цаймигу министерстварттал ва идарарттал вакилтал.
Ххал бивгьунни экономикалул, паччахIлугърал ва жяматийсса мюхчаншиву дуруччаврил хIакъиравусса масъалартту, дунияллул халкьуннал дянивсса экстремистътурайн ва террористътурайн къарши буккаврил чаранну. Дурунни хъунисса агьамшивуртту дусса инфраструктурарттал объектру ва мукунма чIявусса инсантал салкьи хьуссса кIанттурду буруччаврин хасъсса тапшурлугъру.