БакIлахъия гьарзану ласласаву мурадрай

Мартрал 11-нний Къизлардал райондалий Аверьяновкаллал шяраву хьунни региондалул конференция: «Дагъус­ттаннал мелиоратив комплекс – цIанасса тагьар, мунил хьхьичIсса захIматшивуртту ва дузалшиндарал ххуллурду». Му бачин бувну ия ДР-лул ХIукуматрал Председатель Аьбдулмуслим Аьбдулмуслимов.

Конференциялий гьуртту хьуминнал ххал бивгьунни щин дишайсса аьрщив мюнпатну ишла даврил, интту хъунил давуртту сакин даврил, мелиоратив комплекс ттинияр тихунмайгу ххуй-хъин баврил, Дагъусттаннал дукиялул мюхчаншиву дузал даврил масъалартту.
«Республика хъанахъиссар щин дишайсса аьрщив чIярусса, хъунмасса регион. Мунил лагру дур 396 азарда гектар, республикалий дур Аьрасатнал Федерациялийсса щин дишайсса аьрщарал 10 %. Республикалий шяраваллил хозяйствалул лухччал бувагу 12% щин дишайсса бунугу, миннуя ласлай бур 70 % ххяххиярттал бакIлахъиялул»,- кунни мунал.
ХIукуматрал Председательнал тIимунийну, Дагъусттаннал мелиоратив комплекс лябу­ккан баву мурадрай республикалул бюджетравату личIи дурну диркIун дур 890 млн къурушру, миннувату 2019 шинал — 500 млн къурушру, 2020 шинал — 301 млн къурушру ва 2021 шинал — 156 млн къурушру.
Аьбдулмуслим Аьбдулмуслимовлул бувсунни мукунма гьар шинах цIу-цIусса аьрщив ишла дуллай бушиву. Масалдаран, ппиринж бугьайсса аьрщарал лагру хьуну дур 26 азарда гектар, миннуя дукIу ларсун дур 118 азарда тонна ппиринжрал. 2021-ку шинал Кьиблалул Да­гъусттаннай мелиоратив давуртту даврийну ларсун дур 237 азарда тонна къюмайтIутIул.
Дузал буллай бур ризкьичитуран лазуни хIадур дуллан­сса кIанттурду. ДукIусса шинал ларсун дур 40 азарда тонна яттил дикIул.
Мира шиннардий (2019-2021) дурну дур цаймигу давуртту:
– 15,6 азарда гектарданий, реконструкциягу дурну, цIу дуккан дурну дур хозяйстварттал мелиоратив сеть;
– 13,05 азарда гектарданий дурну дур фитомелиоратив давуртту;
– 8,5 азарда гектарданий дурну дур культуротехникалул давуртту;
– дурккун дур10 скважиналул къуй, щинахьхьун гьан дурну дур 6500 гектар ризкьилун­сса лухччал;
– 36 хозяйствалуву 3791 гектарданий дурну дур гидромелиоратив давуртту.
Конференциялий махъру лавхъунни мукунма ДР-лул Минмелиоводхоз ФГБУ-лул директор Залкип Кьурбановлул, шяраваллил хозяйствалул министрнал цалчинма хъиривчув Шарип Шариповлул, ДР-лул Халкьуннал Мажлисрал председательнал хъиривчув МахIаммад Патхулаевлул, Нугъайнал райондалул бакIчи Мухтарбий Аджековлул ва цаппара цаймигу районнал каялувчитурал. Аьбдулмуслим Аьбдулмуслимовлул бувсмунийн бувну, шикку бувсса маслихIатру, хIисавравун лавсун, Республикалул мелиоратив комплексрал лябуккулул стратегия хIадур дуллалийни ишла буван тIий бур.