Вай гьантрай «Дагестан» РИА-лул редакциялий «Открытая власть» проектрал лагрулий журналистуращал хьунаавкьунни Дагъусттаннал региондалийсса АьФ-лул Пенсионный фондрал отделениялул каялувчи МахIаммад Исяев.
Агьалинал пенсиярттал хIакъиравусса личIи-личIисса суаллу буллай, пресс-конференциялул даву дачин дурну ия Дагъусттаннал информациялул агентствалул каялувчи МахIаммад МахIаммадов.
Пенсионный фондрал каялувчинахьхьун буллалисса чIявуми суаллу бия оьрчIру цивппалу хъуни буллалисса ниттихъансса, буттахъансса, лякьлуву оьрчI бусса, ахIвал кIюласса хъаннинсса пособиярттал хIакъиравусса. Вайннул хIакъираву МахIаммад Исяевлул бувчIин бунни буттал ягу ниттил цалвалу оьрчIру хъуни буллалисса кулпатирттансса пособиялул лагру 2022-ку шинал 5749,5 къурушрайн дирсса душиву, лякьлуву бусса хъаннинсса пособие 6275,5 къуруш душиву. ХIукуматрал чулухасса хъунмасса кумагну хъанай бур ниттил ягу буттал цалвалу хъуни буллалисса оьрчIансса 8 шинава 16 шин хьуннинсса пособияртту. КIицI лавгсса пособие ласунсса ихтияр дур прожиточный минимумран ккаккан дурсса доходраяр ххишала дакъасса, буттал ягу ниттил 8-16 шинавун бияннинсса оьрчIру цалалу ябуллалисса кулпатирттахь. Дагъусттаннай ца инсаннан ккаккан дурсса прожиточный минимумрал лагру дур 11515 къуруш.
ХIакьинусса кьини Дагъусттаннал Пенсионный фондрайн ялув кIицI лавгсса пособиярттал хIакъираву кьамул бувну бур 105 азарва аьрза, миннува 36 азара инсаннал ларсун дур вай выплатартту.
МахIаммад Исяевлул личIинура кIицI ларгунни, хьхьичIара Соцзащиталул дуллай диркIсса, ларгсса шиная байбивхьуну Пенсионный фондрайн тапшур дурсса, агьалинан ка-кумагрансса цаппара выплатартту. Бусаврийн бувну, Пенсионный фондрайн ххишаласса даву ялун дирну дунугу, сакин бувну бур оьрчIах буруглагисса, цIуну бувсса оьрчIансса пособияртту буллансса ва Чернобыллай бивкIминнан, аьралитурал кулпатирттан ва цаймигу хIаллихшиннарду дагьайсса инсантурансса выплатартту дуллансса график.
Мукунма ведомствалул каялувчинал балжину бувсунни гьашину пенсиярттал ялун диллалисса индексациялия, ЕДВ, социал хIаллихшиннардая, ниттихъал капиталдания.
2022-ку шинал февраль зуруя байбивхьуну, цалчин бувсса оьрчIансса ниттихъал капиталданул лагру дур 524 527,9 къурушрайн дирсса. Вара лагрулул ниттихъал капитал дагьлай дур 2 оьрчI бусса кулпатирттан, агана 2-мур оьрчI бувну ягу бувцуну бухьурчан, 2020-ку шинайн бияннин нитти-буттахъал сертификат ларсун къадиркIхьурчан.
Ялагу ниттихъал капиталданул лагру 53 712,27 къурушрал хъунна хъанахъиссар, агана кулпатравусса 2 оьрчI 2020-ку шиная шинмай бувну бухьурчан. Му чIумалсса капиталданул лагру дур 693 144,1 къуруш.
МахIаммад Исяевлул бувчIин бавуртту дунни электрон журалийн буцлацисса захIматрал книжкарттаягу, бувсунни миннуйн бучIавриву агьалинан хъуннасса рахIатшиву хьунтIишиву. Выплатарттал, пособиярттал ва пенсиярттал хIакъираву хIасул хьусса суаллу булун ва аьркинмур кIул бан бюхъайссар Инстаграмрайсса Дагъусттаннал Пенсионный фондрал страницалий ва мукунма Пенсионный фондрал сайтрай.
Электрон журалийсса захIматрал книжкарттайн бучIаврил хIакъиравусса информация кIул бан бюхъайссар мува ПФР-рал сайтрай ва госуслугарттал порталданий.
