На сайрданий увкссияв Бярнихалу тIисса кIанайн. Ва кIану буссар Вихьуллал ва Ссухъиящиял шяраваллал дянив. Бярних жул хъугу дикIайссия. Шиккун Ттуккул-БурхIаяту най буссар бакIъялавайсса машиналул ххуллу. Жул хъу цурдагу Бярнихаллил кьабакIраву аьрщарай дикIайссия. ЧIярумур чIумал ттул ниттил, аьпа бивул, ХIуриял, кIикку лухIи хъюрув дугьайва. Жул хъуния яларайсса лухччайгу та чIумал лахIунтту хьусса хъуру дикIайва. Утти вай лахIунттугу, жул хъугу гъаттара- лухччайн кIура дарну дур.
Ца чIумал ккурчIав щя­бивкIун бунува, аьпа биву ттул чIаххувчув Парххухъал МихIал кIицI бувуна гъаттарал парал лухччив, хъуру ччуччин дуллай дур тIисса зат. Нагу, ттунма къакIулмуния бяст къабуллай, хъина-къахъина куну, ихтилатравух хIала къаувхссияв. Ххал буварча, аьпа бивун кIулну бивкIун бур.
Бярнихаллия яларайсса лахIунттив дия гъаттарал, балчантрал парал дурцIуну. На бувккуссия ца журналданий, Австралиянаву кенгурулул лухччив парал дуцIин дуллай, банмур бакъасса чIумал, ца аьлимчувнал тай лухччайн гъангъаратIив бакьин маслихIат бувну бивкIсса зат. ГъангъаратIал, парая ккур­ккисса «хъюрув» дуллай, аьрщарайх ппив дуллан бивкIун бур. Жунмагу, субботник дайссарив, цайми ишру байссарив, аьркинну бухьунссар жула лухччайх пара ппив буллан.
Ттул пикрилий, ва хIисавравун ласун аьркинсса зат бунуккар.