Дагъусттаннал БакIчи Сергей Меликовлул каялувшиврий хьусса батIаврий ххал бивгьунни дунияллул халкьуннал дянивсса санкциярттал тагьардануву Дагъусттаннай экономика цIакьну лядуккан дуллансса оператив штаб сакин баврил ва кризисрайн къаршисса чаранну аьям баврил хIакъиравусса масъалартту.

«Жунма цинявннан кIулли цуксса гужсса кьюч бигьаву дуллай буссарив махъсса гьантрай жула билаятрайн. ЧIявуми билаятирттал цIу-цIусса санкцияртту гьаз буллай бур Аьрасатнайн къаршину. Мура чIумал ми санкциярттал лиян дуллай дур миннал цалламургу экономика», – кунни Сергей Меликовлул.
Мунал тIимунийну, жула билаят хIадурну бивкIун бур санкциярттайн. Муниннин кIира кьинилул хьхьичI Аьрасатнал Президентнал дурсса батIаврий ххал бигьлай бивкIун бур му тагьардануву Аьрасатнал экономика дуруччаврин хасъсса чаранну. Ми чараннал хIакъиравусса кIива хIукмулий къулбасру дурну диркIссар билаятрал бакIчинал.
Аьрасатнал экономика кьянкьану лядуккан даврил хIа­­къиравусса батIаву дурну диркIссар мукунна билаятрал ХIукуматрал Председатель Михаил Мишустиннул.
Билаятрал экономикалун кумагрансса чараннавух бур укун­ссагу: шинал ахирданийннин къадагъа дишин ишбажаранчитурал ва чIиримур бизнесрал давуртту ххал дигьлан, хъирив бизлан.
ХIукму хьуну бур шяраваллил хозяйствалул бакIлахъия ласайминнал хIаллихшиннал кредитирттан личIи дуван 5 млрд къуруширттал, мунил хаснура хъуннасса агьамшиву дур интту хъуру дугьаврил чIумал.
Санкциярттал чIумал республикалул экономика лядуккан даншиврул кьамул бантIисса чараннал хIакъираву бувсунни ДР-лул Председательнал цалчинма хъиривчув Руслан Аьлиевлул.
Оператив штабрал давурттал, мунил хьхьичIсса масъаларттал хIакъираву бувсунни республикалул премьер-министр Аьбдулмуслим Аьбдулмуслимовлул. Мунал тIимунийну, 5 кьинилул му­тталий дуван тIий дур багьрал тагьарданул анализ ва кIул дантIий дур цуксса луртан лирчIун ду­ссарив дукиялул сурсатирттал. Республикалий чан хъанахъимур чIаххувсса регионная ласун тIий дур.