[dropcap]М[/dropcap]ахIачкъалалив АьФ-лул обороналул министрнал хъиривчу генерал-полковник Юнус-Бек Евкуровлул Аьрасатнал Виричу, гвардиялул хъунама лейтенант НурмахIаммад ХIажимахIаммадовлул ЦIу­ку буллунни ванал нитти-бу­ттахьхьун ва щарссанихьхьун. Мероприятиялий гьуртту хьунни Дагъусттаннал БакIчи Сергей Меликовгу.

Украиннай хасъсса аьрали операция байбивхьусса цалчинсса гьантрайва десантно-штурмовой бригадалуву НурмахIаммад ХIа­жимахIаммадов гьан увну ивкIссар хасъсса задание биттур дан. Душманнал вив лавсун захIматсса щаву дирсса чIумалгу ярагъ щяв къабивхьуну талай ивкIссар. Махъра-махъсса граната руртун, ванал цувагу, цачIанма гъан хьусса неонацисталгу пIякь учин бувссар.

Цала ихтилатраву Евкуровлул кIицI лавгунни НурмахIаммадлул къучагъшиву ялун нанисса никиран, ттиния тихунмай аьралуннаву къуллугъ буллантIисса жагьилтуран эбратну хьунтIишиву. Аьра­сатнал обороналул министр­нал чулуха жижарагу бувну, ванал барчаллагь увкунни Виричунал гъанцириннахь, укун къучагъсса арс, лайкьсса хIаписар, хIакьсса патриот тарбия увну тIий.
Сергей Меликовлул кIицI лавгунни НурмахIаммад зунттал чувнал яхIгу, къириятгу оьтту-ттурчIавухра дуллусса жагьил ивкIшиву.

– Циксса шинну гьарчагу, хIаписар НурмахIаммад ХIажимахIаммадовлул къу­ча­гъ­шиву халкьуннан дакIний дикIантIиссар. Цала шеърирдаву увкусса куццуй, ва, барзу хьуну, зунттал ялтту лахъну гьава буллантIиссар, – увкунни Да­гъусттаннал БакIчинал.

– Жува аьрасатлувталлу. Жува гьарица чIумалгу, гьарица ишираву, ца заккана кунма, цачIу, кувннал кув бувгьуну бикIан аьркинссару. Билаятрал мюхчаншиврул, цашиврул цIанийри НурмахIаммадлул жан дуллусса, – увкунни Виричунал ппу Энгельс ХIажимахIаммадовлул.