На цакьнивагу «Илчи» кказитрай кIицI бувссия, шагьрурдайсса ттучаннан дирзсса чил мазурдийсса цIарду жула мазрайн дуцин аьркинни т1исса пикри. Цалчин на ва иширая чивчуссия Аьрасатнаву Культуралул ирсирал шин душиву баян бувсса чIумал. КIилчингу, дукIу нава МахIачкъалалив лавгун унува, гьантта ивкIсса къатлул чIавахьулттил лулттусса ххуллул тия чулий янилун дагьлай диркIсса чил мазурдийсса чичрурдая.
Шинал дайдихьулий Аьрасатнал Президентнал баян бувунни гьашинусса шин «Год культурного наследия народов РФ» душиву. Жула Дагъусттаннал чIяву миллатирттал мазругу бухлахиссар ирсирай жучIанна дирмунивун.
Шиккува ца укунсса ишираягу бусан ччива. Ца чIумал на, МахIачкъалаллал шяраваллил техникумраву дуклакисса ппурттуву, жула группалущал сентябрь зуруй тIутIи батIлай уссияв Белиджи тIисса шяраву. Ттун гиккусса, муххал ххуллул вокзалданул чIирайн лачIун дурсса, вокзалданул цIа чирчусса ула махIаттал дирзуна. Мукунмасса иш бикIан аьркинни жучIавагу.