Бусурман аьлимтурал бувсунни гьашину МухIаммад Идавс (с.аь.с) ссавруннайн гьаз хьусса Миъражрал хьхьу т1айла дагьшиву февраль зурул 27-мур хьхьунийн. Ва бусурманнал календарьданийсса агьамсса датар. Ражав зурул 27-мур хьхьуну МухIаммад Идавс (с.аь.с) КяъвалучIа шанай ивкIун ур. Ванан «ЧантI уку, шанашима !» тIисса чIу бавну бур.
Яру тIивтIукун, Идавсин (с.аь.с) исвагьисса, кIяласса яннардавусса, Жабраил ва Минкаил, малаиктал ккавккун бур. Гайннал чIарав балчаннуха лавхьхьусса, тIинтту куннасса хъаругу дусса, Буракь бавцIуну бивкIун бур. МухIаммад Идавс (с.аь.с), Буракьрай буртти ивкIун, янил ляпI учиннин Мадиналул аьрщарай хьуну ур.
Микку Жабраил малаикнал Идавсихь (с.аь.с) чак бува куну бур, га цалва Гьижра бантIисса Мадиналул аьрщи душивугу бувсун бур. Муния махъ гай ТIур-Синай тIисса, Муса-идавс Аллагьнащал гъалгъа тIий ивкIсса зунттучIа бавцIуну бур. Гиккугу МухIаммад Идавсил (с.аь.с) чак бувну бур. Яла гай Байт ЛахIм (Вифлием) тIисса шагьрулийн бувкIун бур.
Гиккугу Идавсил (с.аь.с) чак бувну бур. Муния махъ гай Иерусалимрайн бувкIун, Байтуль-Мукьаддасраву МухIаммад Идавс (с.аь.с) цинявппа идавстуращал хьунаавкьуну, гайннащал имамну авцIуну, жяматрай чак бувну бур. Мизитрава уккайхту, ганан ххал хьуну бур ссаврунная нурданул чанна лавхъсса чуртту ливккун, му чурттуйх мугьлат бакъа янил ляпI учиннин лавхъун ур ссавруннайн (аль-Миъраж).
Му аруллагу ссавнийн гьаз хьуну, яла цучIав ттинин гьаз къавхьусса лахъшиврийн гьаз хьуну ур. Аль-Исраъ валь-Миъраж хъанахъиссар Аллагьу Тааьланал так жула Идавсин (с.аь.с) дуллусса ляличIисса хасшиву ва хIурматшиву. Миъражрайсса чIумал Идавсин (с.аь.с) Ссавруннал Кяъба, Алжан, Дуржагь, Аьрш, Курс ва цаймигу чIярусса, инсаннал аькьлулуща хъирив лаян къашайсса караматру ккаркссар.
Гьарца ссавний идавстал хьунабакьлай бивкIссар. Му хьхьуну Аллагьу Тааьланал бусурманнай гьантлун ххюва чак ялув бувссар. Ссаврунная ливккукун МухIаммад (с.аь.с), Буракьрай щяивкIун, гацIана цува шанай ивкIсса кIанай чантI увкуссар.
