Москавливсса даврил аьрххилий Дагъусттан Республикалул БакIчи Сергей Меликов хьунаавкьунни Аьрасатнал Федерациялул культуралул министр Ольга Любимоващал. Вайннал дянивсса агьаммур ихтилатгу хъунмурчIин хьунни «Культура» национал проект иширайну щаллу даврил лагрулий культуралул идарарттал, творчествалул коллективирттал чIарав бацIаву мурадрай жулла республикалий дуллалисса давурттаясса.

Сергей Меликовлул барчаллагь увкунни Аьрасатнал Федерациялул Культуралул министерствалухь, жулла региондалий щаллу дуллалисса проектирдавусса чIарав бацIаврихлу. Нацпроектрал лагрулий республикалий дуллалисса давуртту кIицI лаглай, ванал бувсуна «Лезгинка» ансамбльданунсса КъавтIаврил къатта буллалаву ссайн дирну дуссарив ва му 2023-ку шинал тIитIинсса пикри бушиву. Бувсунни республикалул хьхьичIунми коллективирттавасса цану хъанахъисса «Лезгинка» ансамбль цила язими номердащал гихуннайгу гьуртту хъанантIишиву «Большие гастроли» программалувух.
«Культура» проектрая тIий, региондалул БакIчинал ялагу бувсунни ва ларгсса шинал республикалий культуралул 7 къатлул ва оьрчIал искусствалул 3 школалул капитал ремонт дуршиву, бувшиву культуралул 4 къатта ва ттизаманнул 2 модельный библиотека.
Ольга Любимовал чIурчIав дунни Дагъусттаннай культуралух хъуннасса къулагъас дуллай бушиврий ва билаятрал Культуралул министерствалул гихуннайгу регионналун цащара шайсса чIарав бацIаву дуллантIишиврий.
Хьунабакьаврил ахирданий Сергей Меликовлул Ольга Любимовайн оьвкуна 2023-ку шинал Дагъусттаннал халкьуннал шаэр Расул ХIамзатовлун 100 шин шаврин хасну хьунтIисса шадлугърайн.