Махъсса ппурттуву жула дянива лавгунни бур кусса язи­сса арсру ва душру, мискин хьунни жула миллат. Инт чантI тIутIисса март зуруй 85 шин хьунтIиссия лакрал балайлул бакIщаращину ивкIсса, щалагу Дагъусттаннал культура хьхьичIуннай давриву хъунмасса бутIа бивхьусса машгьурсса композитор Мазагьиб Шариповлун.

АьФ-лул культуралул лайкь хьусса зузала, ДР-лул искусствалул лайкь хьусса ишккакку, «Дагъусттаннал вирдакI» тIисса ДР-лул ПаччахIлугърал премиялул лауреат, Дагъусттаннал халкьуннал артист Мазагьиб Шариповлул музыкалул творчествалуха зузисса 60-нния лирчусса шиннардий чивчусса хIат-хIисав дакъасса балайрдал республикалул магьирлугъ хьхьичIуннай ва авадан дурссар. Мазагьиб Шариповлул, лакрал бакъассагу, цайми миллатиртталссагу жагьилсса балайчитал, агьалинал хьхьичIун буккан бувну, тIайла бацIан бувссар магьирлугърал ххуллийн. Композиторнал творчествалунсса яла бюхттулмур кьиматнугу хьуссар хIакьинусса кьинигу республикалул цинявппагу мазурдий ванал макьаннайсса балайрду тIийнма бушиву.
Нажагьсса акъа-акъахьун­ссар Шариповхъал кулпатрая къабавсса, къакIулсса инсан.
ТалихI бусса ухьунссия Мазагьиб, цала оьрмулул дус Мирханумлущал кьадар кIибачIин кьисмат хьусса. «Гьарицагу машгьурсса, бюхттулсса адаминал чIарав буссар лайкьсса хъамитайпа» тIисса аькьилсса махъру буниялагу МирханумлуцIун бавкьусса бур. Ванащал цачIу оьрму бутлатисса шиннардий ванал музагу, цалчинсса критикгу, ласнайн дакI тIайласса кулпатгу, лакрал пахрулунсса балайчигу Мирханум бия. Гьарица чулийннай дияйва ванил дакIнил гъилишиву. Мазагьиблул нину Написат дикIайва жул чIаххуврай ялапар хъанай. На школалий дуклай бусса чIумал, дакIний бур, Написат МахIачкъалалия Хъусрахьхьун автобусрай Мирханумлул цинма гьан бувсса ссайгъат букан чIаххув-чIаравнайн оьвтIисса.
– Буссияв хиял вила оьрму укун машгьурсса инсаннацIун бахIинсса, ссая бикIайва оьрчIнийсса хияллу? – тIий, цIухлай бура Мирханумлухь.
– Духьунссия ттувугу тIабиаьтрал дуллусса, балайлухсса ччаву. Балайчи хьунна тIисса пикригу тачIав бакъассия. Нанисса щинал ххуллу байщун къашайсса кунма, Мазагьиблул макьаннахун балайрдурив цивппа бачайва, – тIий бур Мирханум.
ХIайп, дакI амрулийн мютIий дан къашай, кулпатраву хьусса оьзрулул дякъин дунни ванил дакI. Бигьану бакъар цIана Мирханумлун, дакIнил макьу дакъа­сса чIумал, чивун бувккун, аьчухну балай тIунгу.
Тикрал бан къашайсса чIунил заллу Мирханумлул балайрдах тIурчарив, мякьнува, уттигу ва сахIналийн букканшиврийн умуд кьукъакьавай, ялугьлайнма бур ванил творчество ххирами.
Вай бия тIабиаьтрал буллусса кIива гьунар цачIун бивсса инсантал. Шариповхъул машгьурну бивкIссар Дагъусттаннал кьатIувгу. ХIайран бувссар вайннал гьунарданул чил билаятирттал тамашачиталгу. Цимилгу гьуртту хьуссар вай Москавливссагу, дазул кьатIувссагу культуралул декадарттай, фольклордал фестивальлай.
Мазагьиб дунияллия лавгсса чIумал, ванал бивкIу цанма хъинну кьувтIушиву буслай, экономист Рамазан Рабаданов чичлай ур.
– Мазагьиб ия Занналва ляличIисса пагьму-гьунар буллусса инсан. Мунал гьунар ва дуллалимур цукунчIав цайминнаща лахьхьин къабюхъан­ссия. 1999-ку шинал мунал кумаграйну Оьруснал театрдануву жу дурссия даргиял балайчитурал концерт. Му уссия ттущал даргиял районнайх занайгу, концертрай гьуртту хьунсса балайчитал язи бугьлайгу. Муния махъ на кумаг бувссия мунан МахIачкъалалив студия тIитIин. Мазагьиб ия хасиятрал уздансса инсан, мунал балайлул гьунаргу бия щихакIуй къалавхьхьусса. Цала дакIнил макьулухгу вичIилий хIасул дайва экьинанисса, караматсса макьанну. Цинявппагу балайчитал ялугьлан бикIайва Мазагьиблул балай учин макьан цахьхьунна дулуннин. Шариповлул макьаннаву бикIайва ляличIисса тIилисин. Мунал макьаннай, лак бакъассагу, балайрду тIун бикIайва дарги, ярусса, агъул ва цаймигу миллатру. На мунахь учайссия ина ура музыкалувусса «Сальвадор Дали» куну. Учин бюхъанссар, оьтту-ттурчIавун дюххайсса Мазагьиблул макьанну дакъасса Дагъусттан биял бакъасса Дагъусттанну чIаланссия куну. ХIайп, жува мукунсса инсаннацIа хьунну.
Мува чIумал цамагу чичлай ия Мазагьиб лаккучув ушиву мунал концертрайн лавгсса ппурттувур цан кIул хьусса тIий. Яручув усса ххай икIайссияв, цанчирчан мунал макьанну муксса машгьурну дикIайва яруссаннал балайчитурал дянив тIий.
Махъ бакъа, авадансса дия ванал творчество, цинявппа ванал ляхъан бувсса балайрду итабакьирча, миннух цимигу гьантлий вичIи дишин багьанссия.
Исват хъанай бур инсантурал бивщусса кьиматраяр лавайссагу, бусравссагу, хIакьссагу цамур бакъашиву.

Мазагьиблуя кумунива

***
Гьунар бусса музыкант-композитор Мазагьиб Шариповлул балайрду лакрал, щалагу Дагъусттаннал халкьуннал балайрдал лавайсса даражалул бардултри.

Мурад Къажлаев

***
Мазагьиб Шариповлул балайрду ца ттун ххуй бизаврил ягу къабизаврил иш бакъар. Цанчирча ми ххирар миллатран, гьарца лакрал кулпатраву ми балайрду кIугу-кIулли, угу-учай. Миллатрал рувхIанийсса оьрмулуву мунал бувгьунни цанмасса кIану. Шариповлухь бур инсантурал дакIру, чантI учин дурну, гьаваслан дансса гьунарданул даража. Му чIумал бучIир учин: «Гьунар – му Заннал дуллусса ларайсса лишанни», – куну.

Ширвани Чаллаев

***
Ттул гьунар бусса дусная, цинявннан ххирасса Мазагьиблуя музыкант, композитор хьуссар, буттал кIанттухсса, миллатрал аьдатирттахсса, лахъи балайрдал мусил мяъданнахсса ччаврил лавсун. Композиторнан мунияр лавайсса кьимат бакъассар.

МахIаммад-Загьид Аминов

***
ХIакьину эстрадалий зий бур чIявусса хасъсса элмугу дурккусса музыкантътал. Тамашачитурал бусраврай кьамул буллай бур анжагъ цала миллатрал оьтту-ттурчIава бувкми, миллатрал аьдат-эбадат кIулми, аьвзалзаманная ядурсса халкьуннал макьаннава яргсса, ляличIисса такьварду лаласун шайми. Мукунсса гьунарданул заллу ур композитор Мазагьиб Шариповгу.

МахIаммад ХIусайнов, композитор

***
Мазагьиб Шарипов жула миллатралгу, Дагъусттаннал миллатиртталгу эстрадалул лирикийсса балайрдал ца яла яргмур ттиркьюкьину хъанахъиссар. ЧIявусса бакъассар укун усттарсса магьирлугърал зузалт Дагъусттаннай. На ва жула миллатрал ца яргшивуну, ляличIишивуну хIисав уллай ура. Цанчирча, ттул пикрилий, бакъахьунссар лакрал цавагу кулпат ванал макьаннай учайсса балайрдах гъирарай вичIи къадишайсса. Укунсса якьутру чIярусса къадикIайссар.

Шалласу Шалласуев

***
Мазагьиблул макьаннал хьхьичIра-хьхьичIсса ххуйшиву цIусса, гьай-гьайкьай, цайми-цайми музыкалул культуралиягу, тарихраягу хавар буну ляхъан дурсса дунугу, махъ бакъа, лакку макьаннал тIингу, тIааьнгу бусса душивур. Миннуйн «индиянал» макьанну учин цучIав сикъасинтIиссар. Ми жула кьакьарттан ишлану, кIулну, тIааьнну экьинанисса душиву гьарнан аьлттуссар. Муниятур Мазагьиблул балайрдал щала Дагъусттан хIайрангу бувсса.

Качар ХIусайнаева

***
Шариповлул макьанну ляхъан даврил лагру дурчIиншиврул гьар анжагъ ца чIивисса иш аьлтту баву. «Щунул щутталу – 2002» тIисса Хъювхъиял цалчинмур балайрдал фестивальданий дуссия уттинин щаллу къабувми балайрдал номинация. Гикку, ттунма дакIнийссаксса, щаллу бувна 27 балай. Миннуву ца кьуваксса бия Мазагьиб Шариповлул. Укун циняв балайчитал, щалла фестиваль цала балайрду тIутIи дан бюхъаву – му бакъарив композиторнал гьунар!

Сулайман Мусаев