Ккурккуллал Зайду
Ккурккуллал Зайду ивкIун ур шаэрнал пагьму бусса, хатI ххуйсса, луттирдай исвагьисса накьичру дан кIулсса дурккучув. Ва увну ур 1827-кусса шинал Ккурклив Исламбулатлул кулпатраву. Дуклай ивкIун ур буттал шяраву, Гъумук, Щиназ тIисса лазгиял шяраву. Ванан кIулну диркIун дур алгебра, геометрия, астрономия, философия, логика. Ваная хьуну ур методика чичин бюхъайсса педагог. Зайдул сакин бувну бур астрономиялул терминну аьрабрай ва лакку мазрай дурчIин дуллалисса словарь. 1877-ку шиналсса восстаниялувух гьуртту хьуну тIий, Зайду гьан увну ур Ссивирнавун, Томский губерниялийсса Тобольск шагьрулийн. Гикку ванал чивчуну бур дакIнийн бичавурттал лугу, тамансса назмулийсса чагъардугу. Миннуву Зайду шикаятрай ур цала якьамасса кьадардания.
Ккурккуллал Зайдун гьашину хъанахъиссар увну 195 ва ивкIуну 140 шин.
Аман, на барзу хьурдай
Аман, на барзу хьурдай,
Лахъну гьава бувайсса,
КIля-Муруллий щяивкIун,
Шяравунай уруган.
Ца шанма махъ чивияв
Дардирдал дурцIу дакIнил,
Хъяшхъар-МачIал бакIрава
Хъахъи тIутIив аьтIунсса.
ЛухIи-Нухлил ялату
Уругарча къуруввай,
Иттату оьттул мукьал
Бярдай бяр бацIанссия.
Хьурдай, Заллу, на читIу,
Мизитраву кюру бан,
Кюрттараву щяивкIун,
Мюталимтал ххал буван.
Дардирдал чIярушиврул,
Пикри гьарзану баврил
Урандалул къаугьан
На нигьачIий икIара.
Лахъисса ссутнил хьхьурдай
Шанан уттубишару,
Пикрирдай дакI дунура,
Чани хьуну жун лякъай.
Буслай бусан къашайсса
ХIал бури ттул чурххирай,
Ккавккун кIул къабуваннав
Ттул дуснан ва душманнан.
Лещан дуван къашайсса
ДакIницIух ларчIсса цIарал
Ччукъаччайсса чурххирай
Аьжаившиву дара.
Ттул дакIницIух ларчIсса цIу
Ттул дустуран кIулния,
Мирза Сулайман хьхьичIну
Леххаврий букканссия.
Ттуйва ттун цIими хъанай,
ЦIунцIу дакIнил бувавай,
Хъювхъу яруннил бавай,
Хъяхъа таривав чайсса?
Таривавли ччуччайсса
Арши бакъа ва ттул чурх,
Къаччивахха, ттул Заллу,
Ссивир аьрщарай личIан.
Ца нахIала бан хьурдай
Зулалдил дяркъу щинал,
ДакIницIух ларчIсса цIарал
Лама лекъащай ккаккан.
Даим жул зуйн леххаву
Ххювагу чаклил хъирив,
Дагъусттан зунттавусса
Абдалтал, нукьабаътал!
Зунттуявав ва ттул дакI,
Ттурлу яла къалагай,
Ттурулливъявав яру,
КIунтIа тIисса къабацIай.
Гьуя-гьарай тIаврил тти
БувкIмур зана бикIанхрав?
Буккавивав жу Лаккуйн,
Ккаккавивав жун Ккурккул?
Алжаннул ккурккай Ккурккул,
КкурчIа ххуй бай жямааьт,
Васиятри жул зухьсса,
Дуаьлуву аманат!
Нажагь сагъсса баярча,
ЖуцIун кумаг бувара,
ЛивтIунни тIий баярча,
Кьулгьу-алхIам буккира.
ЯтIул ккурмузул ахъру,
Даххана хъюртул мурхьру,
Дяркъу щинал щаращив
Кьабивтсса мяйжанссарвав?
Лахъину дурсса ссавур
ЯтIул мусилли чайхха,
Тти жунгу дан багьунни,
Ссайн дуккайрив ххал дуван.
Аманатри, уссурвал,
Пашманшиву мадару,
Шава шаний ивкIуну,
ХIатталлив гьав хьуманай.
Аллагьнайн щукру бара
Лухччи-ссав дуцIинуксса,
Гъужихъал АьвдурахIман
Къуллугъиран уллусса.
Аллагьнал амру буна,
Цува дурккусса уна,
Ссавур дакъул вай махъру
Циривавлий мачари!
Ци банссарив къакIулну,
Бан-битан бухлагаврил,
Къумасса дакIнивату
Бувккун лавгсса махърури.
Нания, база-мискин
Гъумучиял заргалтал,
Щархъиял хIалтIухъантал,
КьатIув лавгун хъуслякъулт,
Зу дурдила ва даву.
Наиб, дивир зун къаччай,
Къарт, юзбаши зун къаччай,
Диванбаши зун къаччай,
Цава ца хьуну зун ччай.
Хъунанал кьадру бакъа,
Мюрщинал хIая дакъа,
КIапIикIрал хIисав дуллай,
ХIисабирттахун багьлай,
Аькьибагу къакIулну,
Аькьубалул бувгьуну,
Багьру жува ва кIанттайн.
БивкIу бури ва дуснакь,
Чурххираву рухI дусса.
Гьав дури дуснакьхана,
ИкъавкIуна уччайсса.
ЛачIал ччатI зун къаччарча,
Увал ини къаччарча,
ДукьрахIан зун къаччарча,
Бигьалавгун къаччарча,
Канаки тти сухари,
ХIачIлачIи тти вай ккуваз.
Ялагу щукру бара,
Цава-ца хьусса куну,
Цавайннан къума хьувча,
Цавайннан гьарта хьувча,
Чув-бунугу ци бури
Ва пана дунияллий.
Заннал цIими бивхьуну,
ПаччахIтурал рахIмулий,
Къахьунххурав, уссурвал,
Къумасса дакIру гьарта?
Жу леххаву учару
Ххювагу чаклил хъирив:
Я жу ляхъан був Заллу,
Кунпаякун бай Заллу,
Лухччи-ссавний ччан бивкIмур
Ччяни хьун байсса Заллу,
Бува ина паракьат,
Жу, вил лагъарт, ичIува!
Нания, база-мискин,
Зайду, на заэв хьура,
Шардалу дакIнийн дагьлай,
Шаний шану къабиллай,
Мюрщи оьрчIру дакIнийну,
ДакIнил цIунцIу учавай,
Янил хъювхъу учавай.
Нанияргу къумасса
Цими къучагъ уривав,
Мюрщи хъами кьабивтун,
Хъирив хъап тIийнма бивкIсса.
Къумама гьарта айма,
Гьартама къума айма,
Я кашилул жул Заллу,
Гьарта дува жул дакIру!
Ссибирлия гьан бувсса чагъар
Я МахIаммад, я Саний,
КIиягу янил чаний,
Аман ца ккаккан хьурдай,
Дуниял кьаританнин.
Я ттул Аьйшат, къатлул ттарцI,
Къатта макьабитара,
На акъари увкуну,
Къатлуйн ччангу мащара.
Я ттул Маржан, Написат,
Уссурваврайн аманат.
ЛухIикъурду ПатIимат
Муъминатлуйн аманат.
Я Чупалав, ттул ссил арс,
Ттул къатта вийн аманат,
МухIаммадай, ттул ссил арс,
Ттул хъуру вийн аманат.
Дин-МахIаммад, Исмяил,
ИчIусса зуйн аманат,
Цинявппагу бавкьуну,
ОьрчIан тIул лахьхьин дара.
СалихI-хIажий, ттул уссу,
Лавхъсса чирахъ кунасса,
КIюрххицIу най изайни,
Дуаьлувух илуша!
Кьура-хIажий, ттул уссу,
Чаклийн авчусса чIумал,
Ттул чарийн я бивукун,
Нагу дакIнийн улути.
Къара Магьдий, ттул уссу,
Шавату уккай чIумал,
Ттулва чарури куну,
Ттул чарий щяилукIу.
Мизитраву хIажийтал,
Чаклий бавцIу муъминтал,
Чаклил хъирив дуаьлий
Нагу хIала увара!
