Мартрал 14-мур кьини (1879 ш.) хъанай дур дунияллий яла машгьурма физик Альберт Эйнштейн ниттил увсса кьини. Жунма кIулли ва аьлимчув, физик акъагу, ивкIшиву аькьилчувгу, хъярчъчигу.
ЦIанихсса физик, аькьилчув дакIнийн утлай, кIицI дуванну ванал зумату дурксса калимарттавасса цаппара.

* * *
Хъами щар шайссар, арамтал баххана хьунссар тIисса пикрилий, арамтурал хъами буцай­ссар, ми тачIав баххана къахьунссар тIисса пикрилий. Ахирданий кIивайвагу пашман шайссар.

* * *
Оьрму цIуницIакул бутан бюхъайсса бивкIссания, ттуя сантехник хьунссия.

* * *
На барчаллагьрай ура ттухьва «къа» («нет») увкусса гьарцаннайнгу. Вайннайн бувнур на нара ци-дунугу дурсса.

* * *
Дуккаву – му школалул программалува хъама битаймур бивтун махъ лирчIмурди.

* * *
КIира затрал дазу-зума дакъассар — дунияллулгу, инсаннал ахIмакьшиврулгу.

* * *
ТачIав гъалатI къаитабавкьуманал тачIав цIусса цичIав ххал къадурссар.

* * *
Жува цинявппагу генийталлу. Амма жува чавахърал бюхъулул кьимат мунища мурхьирайн лахъан къабюхъаврийну бишларчан, мунил оьрму бутанссар цуппа авлиянан ккалли буллай.

* * *
Оьрму ласапIитIрай бигьавриха лахьлахьиссар, акъагьаншиврул, ина нанисса-найна икIан аьркинссара.

* * *
Ттун къакIулли дунияллул шамилчинмур дяъвилий ци ярагъ ишла буллантIиссарив, амма кIулли дунияллул мукьулчинмур дяъвилий чартту ишла буллантIишиву.

* * *
КъабучIиссар бюхттулсса ккаккиярттая ва хьхьичIуннай­шивурттая гъалгъа тIун, аьрщарай алши бакъасса оьрчIру бу­ссаксса.

* * *
ТалихIрай оьрму бутлан ччарча, зу, инсантурацIун ягу затирттацIун бавхIуну бикIан къааьркинссаруча, зулва хьхьичI бивхьусса мурадирацIун бавхIуну бикIан аьркинссару.

* * *
ТалихI – му ххуйсса цIуллуши­вугу, оьккисса памятьгур.

* * *
КIирива-кIирисса пачлий щяивкIсса ца минутIгу вин щаллусса ссятну чIалай дуссар. Вила карав ссурухIи щябивкIсса ца ссятгу вин ца минутI кунна чIалай дуссар. Вари «теория относительности».

ХIадур бувссар Бадрижамал Аьлиевал