[dropcap]М[/dropcap]арт зурул 22-нний Гъумук, райондалул Культуралул къатраву, хьунни дуклаки оьрчIал дянивсса шахматирттал турнир. Ва хас дурну дия Совет Союзрал Виричу, летчик-космонавт Муса Маннаров увсса кьинилун. Шиккува бусан, Культуралул къатраву сакин бувну бур Маннаровлул цIанийсса шашкарттай-шахматирттай буккай клуб. Мува клубраву хьунни уттисса турниргу.
Ва даврил сиптачиталну бия Райондалул Культуралул, жагьилтурал политикалул, спортрал ва туризмалул центр. Ванил хъунаманал хъиривчу Малик ХIусмановлул бувсунни гьашинумур турнир кIилчинсса душиву, турнир сававну дуклаки оьрчIал дянив шахматирттай буккаву ялу-ялун сийлувун дагьлай душиву.
Турнирданул дайдихьу дуллалисса махъ лахълай, «Единая Россия» партиялул Лакрал кIанттул отделениялул секретарь Юсуп МахIаммадовлул бувсунни Муса Маннаровлул оьрмулия ва космосравунсса мунал аьрххи-ххуллуя, барчаллагь увкунни шахматирттал турнир лайкьну шаврил цIаний хIарачат буллалиминнахь.
Турнирданий гьуртту хьунни райондалул шяраваллавасса 50 оьрч1. ХьхьичIунсса кIанттурду бувгьуминнан дипломру, кубокру ва арцуйнусса бахшишру дуллунни. Ххув хьуми барча буллалисса шадлугърай гьуртту хьунни райондалул хъунаманал хъиривчу Абакар Къюннуев, КIулшиву дулаврил управлениялул хъунама Тамерлан МахIаммадов.
