Март зурул 2-нний, Дагъусттаннал БакIчи Сергей Меликовлул каялувшиврийну, Дагъусттаннал халкьуннал шаэр Фазу Аьлиевал 90 шинал юбилейран хасну дувантIисса, давурттив ххал диргьунни хIукуматрал заседаниялий.
ХIукуматрал хъунаманал хъиривчув Муслим Телякавовлул бувсунни Фазу Аьлиевал оьрус мазрайсса чIявутомру ва яру мазрайсса кIива том итабакьин хIадур хъанай бушиву. Мукунма ххуйсса иллюстрациярдал чIюлу бувсса, пишакашран булун поэтессал аьнтIикIасса лугу итабакьинтIишиву. Ванил цIа абад дуван тIий бур, МахIачкъалаллал цания ца школалунгу цIа дирзун. Фазу Аьлиевал юбилей Москавливгу дувантIишиву бувсунни Аьрасатнал Президентнал Дагъусттаннал Полпред Владислав Толстюклул. Поэтесса бувсса кьини февраль зуруй хъуннасса мероприятие дувантIиссар Литератортурал къатлуву (Центральный дом литераторов) увкунни ванал. Культуралул министр Зарема Буттаевал республикалий ва кьатIув юбилейрал хьунинсса давуртту дуллай байбивхьушиву бувсунни, масалдаран, цIусса шинал дайдихьулия шинмай Расул ХIамзатовлул цIанийсса Национал библиотекалуву дурну дур выставкарду, Поэзиялул театрдануву литературалул мажлисру. Бувсунни Фазу Аьлиева яхъанай бивкIсса къатрал чIирай ванил цIа чирчусса мармарчарил ула лахъантIишиву ва Оьруснал драмтеатрдануву хъуннасса мероприятие дувантIишиву, мукунма шинал лажиндарай поэтессал назмурду ккалаккисса флешмобру, конкурсру бикIантIишиву. Ялагу цуку-цукунсса мероприятиярду дуллан дакIний буссарив бувсунни жагьилтурал министр Камил Сяидовлул, кIулшивурттал ва элмулул министр ЯхIия Бучаевлул, национал политикалул ва динийсса иширттал министр Энрик Муслимовлул.
