[dropcap]М[/dropcap]артрал 21-нний «Дагестанская правда» кказитрал редакциялий хьунни ДР-лул промышленностьрал ва машлул министр Низам Халиловлул ва хъунисса ттучаннал вакилтурал брифинг. Муний ххал бивгьунни республикалий цаппара хъус-хъиншивурттал ва дукиялул багьри баххана шаврил тагьар, муницIун бавхIуну ишбажаранчитурал давурттал ва паччахIлугърал чулухасса кумаграл чараннал масъалартту.
Министрнал тIимунийну, бакIрай багьри лахъ хъанай бавчуну бур февральданул ахирданий, мартрал байбихьулий, мунил савав хьуну дур инсантал, гьалак бувккун, ттучаннава хъус машан ласлай байбишаву. Му чIумал ласлай бивкIун бур ичIаллил техника, мебель, машинартту, электроника. Халкь нигьа бувсун бивкIун бур, санкциярду дишаврийну, чил билаятирттал компанияртту Аьрасатнал рынокрава лавгун, ттучаннаву хъус къаличIанссар тIий.
Яла муштаринал чялишну машан ласлан бивкIун бур жула билаятрай дуккан дайсса дукиялул сурсатругу (курпа, иникIма, макIарунну, хIуву качар). Мура чIумал Дагъусттаннал ХIукуматраща бювхъуна ми сурсатру жучIара чан хьун къадитан.
«ДР-лул Минпромторграл гьарца кьини дуллай бур дукиялул ва цаймигу сурсатирттал багьрал ва луртаннал мониторинг (багьри баххана хъанахъаврил ялув бацIаву). Жу даим дахIаву дуну буссару опталул машлул идарарттащал ва муниципалитетирттал каялувчитуращал, захIматсса тагьар хьурча, ччясса мутталий дузал даву мурадрай», – кунни министрнал. Мунал тIимунийну, мартрал 21-нний дукиялул сурсатирттал луртан региондалий дур 30 гьантлунсса. Цаппара сурсатирттал луртан тIурча – 90 гьантлунсса. ЦIанасса ппурттуву инсантурал, таний кунма, гьалак бувккун, ласлай бакъар дукия. Республикалий гьассаксса дур дукиягу, цайми журардал хъус-хъиншивурттугу.
Брифинграй ттучаннал вакилтурал бувсунни ци тагьар дуссарив миннал ттучаннаву дукиялул луртаннал. Масалдаран, «Зеленое яблоко» тIисса ттучандалул директор Къизханум Аьлиевал тIимунийну, мартрал бачIи хьуннин инсантурал миксса чIярусса дукия ласлай бивкIун бурхха, хIатта ттучандалул зузалтран багьну бур гьарца муштаринахьхьун чан-чансса дакъа къадуллан. ЦIанасса ппурттуву гьалак бувккун ласлай бакъасса бур, дукиярттугу ттучандалий ттигу аьркинссаксса дур. «ЧIярусса дукия ичIуннай ххюрхху дуллалаврил пайда цир, ми яла зия хъанан дикIайхха», – кунни ттучандалул директорнал.
Брифинграй гьуртту хьуминнал жавабру дуллунни журналистътурал суаллахьхьун.
