ЦIуссалакрал райондалул чулухасса кумаг

Вай гьантрай ЦIуссалакрал райондалия 13,5 тонна гуманитар кумаграл тIайла дурккунни Донбассрал агьалинан. Райондалул агьалинал цачIуну бавтIсса гуманитар кумаг гьан бунни цIана Ростовуллал областьрай чIумуйну ялапар хъанахъисса Донбассрая бувкIсса лихъачалтран. Вайннал оьрмулун аьркинсса тIалавшиннарду хIисавравун ларсун, райондалул жяматрал кумагран дартIунни дуки-хIачIия ва лаххи-ликкия. ЧIирисса чIумул мутталий агьалинан гуманитар кумаг батIинсса сиптачину увккунни ЦIуссалакрал райондалул администрациялул бакIчи МахIаммад-ХIажи Айдиев.

«Дяъвилува ливхъун бувкIсса инсантуран ххишала дакъа аьркинну дур продукты, янна, усру ва мюрщисса оьрчIансса кьай-кьуй. Лихъачалтраву бур чIявусса мюрщисса оьрчIру. Мунийн бувну, ва ххуллух жува аьркинссару, цинявппа цачIун хьуну, кьини дурксса инсантурал чIарав бацIан. ЦIуссалакрал агьулданун щиннияргу хъинну кIулссар вай инсантурал духIлахIисса захIматсса кьинирду.
1999-ку шиналсса дяъвилул иширттаву ЦIуссалакрал райондалул агьалигу мюхтажну бикIссар инсантурал чулухасса кумаграх. Му чIумал, нех дирхьуну, кумаг буллай бивкIссар жула чулухунмайгу. ХIакьинусса кьинигу райондалул жямат барчаллагьрай буссар чIарав бавцIусса цинявппагу инсантурайн. ЦIана Донбассрал агьалинал чIарав бацIавугу жула цинявннал буржри», – увкунни МахIаммад-ХIажи Айдиевлул.
Гуманитар кумаг биян бувансса транспорт щаллу дунни райондалул администрациялул. Хъунмасса кумаг ва давриву буллай бур Дагъусттаннал Жагьилтурал министерствалул чулухасса волонтертал.