Кумаг бувминнахьсса барчаллагь

ЦIуссалакрал райондалул каялувчитурал барчаллагь увкунни Донбассраясса лихъачалтран кумаг бувминнахь.

ЦIуссалакрал райондалул хъунаманал барчаллагь увкунни Донбассраясса лихъачалтран кумаг бувсса, райондалий шяраваллил хозяйствалуха зузисса инсантурахь. Кумагран гьан дурсса дуки — хIачIия ва чара бакъа аьркинмур 13,5 тонналийн дирсса дур. Вайннуву дур шушравусса щин, консерварду, макаронну ва цаймигу затру. Арцуйнусса кумаг бунни ЦIуссалакрал райондалийсса шяраваллил хозяйствалул предприятиярттал каялувчитурал: Давдиев ТIагьирдул – 100 азарда къуруш, Рамазанов Аьлил – 100 азарда къуруш, Мусиев Алгерейл – 100 азарда къуруш, ХIасанов Тажуттиннул – 50 азарда къуруш, Чакаев Султаннул – 100 азарда къуруш ва Рамазанов Таймуразлул – 50 азарда къуруш.
ЦIуссалакрал райондалул бакIчи МахIаммад-ХIажи Айдиевлул барчаллагь увкунни захIматсса тагьардануву ливчIсса Донбассрал агьулданун кумаг бувминнахь.
Кумаг тIайла бувкссар Ростовуллал ва Новгородуллал областирдайн ва Къиримнавун, лихъачалтрал чIумуйсса ликказан дур­сса пунктирдайн.