Каспийск шагьрулул мэр Борис Гонцов хьунаавкьунни Луганскалия ливхъун бувк1сса Екатерина Синельниковащал ва ванил оьрч1ащал. Ванащал бия шагьрулул депутатътурал собраниялул председатель АьбдулвахIид Жаватов, шагьрулул КIулшиву дулаврил управлениялул начальник Лариса Абрамова, Аьрасатнал ОМВД-лул Каспийскалий­сса вакилтал, мукунма шагьрулул УСЗН-лул, шагьрулул хъунмур азарханалул ва оьрчIал поликлиникалул вакилтал.

Екатерина ва ванил оьрчIру хасну Каспийск шагьрулийн бучIаву хар-хавар бакъа хьусса ишну къахъанахъиссар – ваниннин ва кулпат бигьалаган бувкIун бивкIун бур шихун.
– Каспийск ттун ттулва аьзиз­сса къатлуха лащай. Ттул нину шихун дирзссия 2014-ку шиналла, тийх, жучIа, аварасса ишру байбишайхту. Гъинттул жу шихун бувкIун бу­ссияв хьхьирий бигьалаган. ОьрчIан шихалу хъинну ххуй бивзуна, – буслай бур ва.
Зунсса кIану аьркинсса Екатеринан шагьрулул бакIчинал маслихIатну ккарккунни школалийсса даву. Кулпатран дуван­тIиссар ва муниципалитетрайсса чIумуйсса регистрация, муния махъ тIурча, бувантIиссар гьарца зуруй оьрчIан булайсса пособияртталсса ва цаймигу социал выплатарттал­сса. ОьрчIру занантIиссар къатрал чIараввасса садикравун.
– Жу Екатеринан маслихIатну ккаккарду школалий лаборантнал даву, ва рязи хьунни. ОьрчIан дур­ссар медициналул аьркинсса хъиривлаяву, цилгу чIалачIи бувсса вай цIуллуну-цIакьну бушиву. ОьрчIру гьунттийва гьантIиссар садикрайн. Лихъачалтран чара бакъа аьркин­сса кумаг бувантIиссар, – увкуна шагьрулул бакIчинал.