Давурттал дузал буллай бур

ДР-лул ЗахIматрал ва социал лябуккулул министерствалул агьали давурттал дузал байсса къуллугъирттал дачин дурну бур «Содействие занятости населения» тIисса паччахIлугърал программа. Ва программалул лагрулий социал къуллугъирттал органну зий дур цивппа рязину терроризмалул иширттавух хIала буххаврия махъаллил хьусса ва терроризмалул (экстремизмалул) ишир­ттавух хIала буххаву сававну танмихI кьувкьуну бивкIсса инсантал давур­ттал щаллу бавриха. Му бакъассагу, соцзащиталул идарарттай дачин дурну буссар укунсса инсантурансса паччахIлугърал чулухасса хIаллихшиннарду дузал дуллалисса цаймигу давуртту.

Ва категориялул инсантал давурттайн кьамул буллалиминнан, вайннан бишинсса харжлугърансса ка-кумаг хIисаврай, кка­ккан дурну дуссар хIукуматрал чулухасса субсидияртту дуллан­сса низам.
2022-ку шинал, ялув кIицI лавгсса ишру сававну танмихI кьувкьуну ивкIсса 23 инсан даврийн кьамул увсса предпринимательтуран республикалул бюджетрава 1 миллион арцул итабакьин ккаккан бувну бур.
ХIакьинусса кьини Агьали давурттал дузал бавриха зузисса республикалул центр вай субсидияртту булун вихшала дусса ишбажаранчитурал сияхI давриха зий бур.
Давурттал дузал буллалиминнаща ва программалувух хIала буххан бюхъайссар кIантту-кIанттурдайсса Агьали давурттал дузал байсса центрдай. Укунсса инсантал давурттал дузал бувминнансса субсидиярттал лагру дур ца инсаннан шанма зурул мутталий 18 азарда къуруш хIисав дурсса.
Му бакъассагу, терроризмалул иширттавух хIала буххаврия махъаллил хьусса ва терроризмалул (экстремизмалул) иширттавух хIала буххаву сававну танмихI лавхъсса инсантуран хасну дуллай бур «Дни открытых дверей» тIисса вакансиярттал ярмаркартту. Мероприятияртту дуллай бур ДР-лул ЗахIматрал министерствалул цIакь бувсса хIукмулийн бувну ва антитеррористический комиссиялул, шагьрулул ва районнал жяматийсса ишккаккултрайн оьвкуну.