Аьрасатнал Федерациялул Президентнал тапшурданийн бувну, Дагъусттан Республикалул БакIчи Сергей Меликовлул кьамул бунни инсантал.
Ва кьини Республикалул БакIчиначIан увкIун ия Семендер поселокрай ялапар хъанахъисса Рустам Хачбабов, поселокрай Пирамидальная кIичIираву ялапар хъанахъисса цинявппагу инсантурал цIания му кIичIираваллил ремонт даврил ялувсса тавакъюращал.
Ванияр 5 шинал хьхьичIва агьалинал дакIру дацIан дурну дур ва кIичIиравалу ххуллурду бакьин баврил программалувун бувтшиврий ва 2019-2020-ку шиннардий бакьин бувантIишиврий. ЧIун ялагу ца шинал махъун дуртун, 2021-ку шиналгу агьалинал ххуллул ремонтрахсса хьул къакьувкьуну бур. Масъала щаллу къашайхту, агьали региондалул БакIчинайн бувккун бур.
– Ччясса мутталий, муниципалитетрал бюджетраву дахханашивуртту дурну, лякъин аьркинссар ва масъала щаллу бувансса ххуллу-хха. Ва шинал июньдалийн бияннин щаллу дуван аьркинссар проектрал ва сметалул документация, ссуттилнин тIурча, ххуллу бакьин буван, – укунсса бигар бивхьунни Республикалул БакIчинал МахIачкъала шагьрулул мэр Салман Дадаевлуй. Шагьрулул бакIчиналгу махъ буллунни 2022-ку шинал октябрьданийннин кIичIиравалу бакьин бувансса. Вания тийнмай ва бигар щаллу баврил ялув бавцIуну буссар хасъсса министерство ва Хъунама федерал инспектор.
Ва кьини республикалул БакIчиначIан мукуна увкIун ия Умар Дибирдадаев, Хъунзахъиял райондалийсса «Обода – Гортколо – Гозолоколо» автоххуллул капитальный ремонтрал ялув. Ххюра километралул лахъишиврийсса ва ххуллул дахIлай бусса бур 1300-нния ливчусса инсантал ялапар хъанахъисса шяраваллурду.
Асфальт бакъасса ххуллу цуппагу буклай бусса бур республикалул агьамшиву дусса «Грозный – Ботлих – Хунзах – Араканская площадка» ххуллийн. ДР-лул транспортрал ва ххуллул хозяйствалул министр Жамбулат Салавовлул кIицI лавгунни паччахIлугърал программалул лагрулий 2023-ку шинал бувантIишиву ва ххуллул ремонтрал проектрал ва сметалул документациялулсса. Сергей Меликовлул тапшур бувунни му проектрал хIадуршиннарансса арцу ва шиналла лякъин.
– Хъунзахъиял райондалун Расул ХIамзатовлул 100 шинал юбилейрайн бахшиш дуванну – хIарачат буванну 2023-ку шиналва ва ххуллу бакьин буван, – увкунни Меликовлул.
