Мартрал 22-нний ДР-лул БакIчи Сергей Меликовлул каялувшиврий хьунни Дагъусттаннал Жяматийсса палаталул давурттал ва властьрал органнал жяматийсса идарарттащал хIала-гьурттусса давурттал мюнпат лахъ баврил масъаларттан хас бувсса батIаву.
БатIаврий махъ лахълай, Сергей Меликовлул бувсунни мунил хъунмур мурад бушиву Дагъусттаннал циняв политикалул ва жяматирттал гужирдал хIала-гьурттуну зузаврил мюнпат лахъ баву.
«ХIакьину жяматийсса идарарттал бугьлагьисса кIану хьхьичIмур ххуттайн буклай бур.
Жяматрал вакилтал (общественники), хъанахъимунил буруккинттарайсса инсантал, ишбажаранчитал , укунмасса инсантал махъсса ппурттуву чялишну гьуртту хъанай бур гуманитар кумаг хIадур баврил давурттавух Украиннаву захIматсса тагьардануву ливчIсса инсантуран кумаг бавриву. Донецкаллал ва Луганскаллал республикарттал халкьуннал ва Къиримнал барчаллагь тIий бур дагъусттанлувтурахь, Дагъусттаннаясса гуманитар кумаграл лагрурду яла хъунимину хъанай дуну», – кунни республикалул каялувчинал.
Дагъусттаннал БакIчинал тIимунийну, жяматийсса идарарттаща бюхълай бур тамансса кумаг буван властьрал органнан агьамсса задачартту дузал бавриву. Цаппара хIукмурду аьркинну бур бувчIин буллан жяматийсса идарарттайхчил, Жяматийсса палаталийхчил ми инсантурачIан бияншиврул.
БатIаврий бувсунни властьрал органнал хъунмур къулагъас дуллай бушиву дукиялул ва дарурттал рынокирттайсса тагьарданух. Амма му аралуву хIасул хъанахъисса захIматшивурттащал лаян так депутатътуралгу, исполнител властьрал органналгу, ягу ихтиярду дуруччай органналгу хIарачатирттайну къашайссар, аьркинссар миккун хIала буххан буван жяматийсса идарарттугу, миннал рынокрайсса тагьарданул ялув бацIаву дулланшиврул.
Республикалул каялувчинал ляличIисса къулагъас дурунни исполнител властьрал органнал ва жяматийсса идарарттал хIала-гьурттушиврул агьамшиврух. Мунал тIимунийну, жяматийсса контроль бикIан аьркинсар идарарттал циняв давурттал ялув. Миккугу Жяматийсса палаталул бугьан аьркинссар республикалий жяматийсса контрольданул кIану.
2021-ку шинал Дагъусттаннал Жяматийсса палаталул дурсса давурттал хIакъираву бувсунни мунил председатель Аьбдулмуъмин Ибрагьимовлул.
БатIаврий махъру лавхъунни цаймигу гьурттучитурал.
