Мартрал 14-нний ДР-лул ХIукуматрал председатель Аьбдулмуслим Аьбдулмуслимовлул каялувшиннаралу ларгсса заседаниялий ххал бивгьунни Дагъусттаннал республикалийсса дарурттал щаллушиндарал тагьар.
Шикку гьуртту хьунни ДР-лул ХIукуматрал председательнал хъиривчув Мурад Казиев, ДР-лул ФАС-рал управлениялул каялувчинал хъиривчув МахIаммад ХIамзатов, ДР-лул ЦIуллушиву дуруччаврил министерствалул Аптечный управлениялул хъунама МирзахIажи БахIандаьлиев ва республикалийсса хъунисса аптекардал сетирдал каялувчитал.
Аьбдулмуслим Аьбдулмуслимовлул кIицI лавгунни республикалий дарурттал багьри гьаз буллай бушиву:
– Билаятрай хъанахъисса махъсса иширттацIун бавхIуну, хIакьину багьлай бур республикалул фармацевтикалул рынокрал даврил ялув бацIан. БувчIлай бур жула хIукуматрал чулухунмайсса санкцияртту баян баврийну цаппара дарурттал багьри гьаз хъанай бушиву. Мунийн бувну, аьркинну бур аптекарттайсса багьрал хъирив бацIан,– увкунни премьер-министрнал.
Аьбдулмуслим Аьбдулмуслимовлул бусаврийн бувну, дарурттал багьри гьаз хъанай бур производстварттай препаратру ххира шаврийну, поставщиктурал цайми хIукуматирттая бучIан байсса даруртту бацIан буллалаврийну ва валюталул курс гьаз шаврийну.
Фармацевтикалул отраслилул вакилтурал буслай бур препаратирттал багьри гьаз шаврил савав Аьрасатнавун чил билаятирттая дучIайсса сурсат чан дуршивруцIун, цаппара хIукуматирттая тIурча, логистикалул чулухасса масъаларттацIун дархIусса душиву.
АьФ-лул ХIукуматрал кьамул буллай бур санкцияртту сававну дарурттал багьри гьаз хьун къабитаву мурадрайсса чаранну. МуницIун бавхIуну АьФ-лул ПаччахIлугърал Думалул чIал къавхьуну кьамул дан тIий дур дарурттал препаратирттал ва цаппара сjциал кьай-кьуйлул багьри цалийн бутаврил хIакъиравусса закон.
Му бакъассагу, АьФ-лул Генпрокуратуралул регионнайсса прокурортурайн тапшур дунни дарурттал багьри ци сававрай гьаз буллай буссарив кIул баврил ялув бацIаву.
Премьер-министрнал кIицI лавгунни цIана вай иширттаха зий бушиву, дунияллул дянивсса тагьарданул иширттацIун дархIуну, республикалул экономика кьянкьану лядуккан даву мурадрай сакин бувсса Оператив штаб.
Республикалул Росздравнадзорданул ххал бигьавурттайн бувну, дарурттал багьри гьаз хьуну бур дянивну 10-50%. ХIакьинусса кьини республикалул складирттай дур 2,5 зуруй биянсса дарурттал луртан.
Аптекардал сетирдайсса дарурттал багьрая бувсунни цIуллу-сагъшиву дуруччаврил ялув бацIайсса Региондалийсса Федерал къуллугърал каялувчи Тамерлан МухIаммадовлул. Ванал бусаврийн бувну, Дагъусттаннал ХIукуматрал чулухасса амрулийн бувну, Роскомнадзор республикалийсса дарурттал багьрал ялув бавцIуну бур. Цаппара дарурттал багьри АьФ-лул ХIукуматрал ккаккан дурсса дазува ливчуну бур. Бур даруртту багьри ялавай багьссагу.
– ХIисав хьунни багьлул кьювкьусса даруртту, масалдаран, 25 къурушран бивкIхьурчан, 75-80 къурушрайн лавхъун бушиву. Ххирами препаратру тIурчан, 15-20% ххира хьуну бур, – увкунни Тамерлан МухIаммадовлул.
Мукунма ванал бувсунни инсулиндалул препаратру мукьлийну, ххюлийну тIалав буллай бушиву.
– ХьхьичIава инсаннал инсулиндалул ца коробка ласайсса бивкIхьурчан, цIана 4-5 коробка ласлай, къанихшиву рутлай бур, мунийн бувнугу гьаз хъанай бур багьри. Аптекардая тIалав бувну буссар мукунсса даруртту инсаннал канихьхьун ца бакъа къабуллан, – увкунни Тамерлан МухIаммадовлул.
Аьбдулмуслим Аьбдулмуслимовлул цIуллушиву дуруччаврил министр Татьяна Беляевайн тапшур бунни яла нигьачIаву думи азардал сияхI дан ва мукунсса къашайшалтрансса даруртту циксса буссарив кIул бан. Татьяна Беляевал кIицI лавгунни республикалий яла чIявуну оьрмулуцIа хъанахъисса ишру къюкIлил-сосудирттал ва онкологиялул азардацIун бавхIусса бушиву.
– Коронарный синдром дусса, нярал оьтту щурущаву куццува бувксса цинявппагу къашайшалтран булун ккаккан бувсса шинайсса дарурттал луртан дуссар. Инвалидсса къашайшалтран буссар ккаккан бувсса ххишаласса даруртту. ХIакьинусса кьини биялсса даруртту бур льготарду дусса инсантуран булун ккаккан бувсса. Аптекардал управлениярттай ва складирттай ца шинайсса луртан дур ялув кIицI лавгсса къашайшалтрансса дарурттал. Республикалул Онкологиялул центрданийгу 4-6 зуруйн бияннинсса препаратирттал луртан дур, – увкунни Татьяна Беляевал.
Премьер-министрнал аптекардал каялувчитурая тIалав бунни препаратирттал багьри гьаз баврил багьана-савав кIицI лагаву ва ми цалийн буцинсса чаранну лякъаву. Мукунсса чараннавасса ца кIицI лавгунни, багьри гьаз къабаву мурадрай, ва отраслилуву зузиминная налогру куклу даву.
Аьбдулмуслим Аьбдулмуслимовлул кьянкьану тIалав бунни багьана-савав дакъана препаратирттал багьри гьаз къабуллалаву.
Республикалийсса дарурттал багьри гьаз хьун къабитаврил ва цалийн буцаврил хIакъираву кIицI лавгсса чараннацIун бавкьунни ДР-лул Ишбажаранчитурал ихтиярду дуруччаврил уполномоченный Мурад Далгатов, ДР-лул Халкьуннал Мажлисрал Экономикалул политикалул комитетрал председатель Сефер Аьлиев.
