Гьашинусса шинал март зуруя байбивхьуну кьамул дан тIий бур захIматрал шартIру дуруччаву мурадрай дурсса дахханашивурттал хIакъиравусса ихтиярдал кьануннал акт. Ва кьанундалийн бувну, инсантуран зузи кIанттурду дузал буллалими буржлувссар зурул мутталий даврийн кьамул бувсса инсантуран мюхчаншиврул кьяйдарду лахьхьин дан. Му бакъассагу, инсантал даврийн кьамул буллалиминнал шинай цал чара бакъа зузалтран лахьхьин буллан аьркинссар иш багьсса чIумал цалчинсса кумаг байсса куц.
Идарарттал каялувчитурал ва пишакартурал цалагу лахьхьайссар захIмат буллалиминнал даву мюхчан даврин хас дурсса дарсру.
ДР-лул ЗахIматрал министерствалул 2021-ку шинал ххал диргьуну дур республикалул шагьрурдайсса ва районнайсса отраслирдай 62 453 инсан зузисса 1700 предприятиялийсса захIмат буллалиминнал шартIру дуруччаврил тагьар.
Ххал бигьавурттал хIасиллайн бувну, предприятиярттай дурссар кIицI ларгсса диял дакъашивуртту духлаган дансса план, 1065 идаралий хIасул бувну бур захIмат буллалиминнан мюхчансса шартIру дузал даву мурадрайсса комиссия. Идарарттал захIматрал коллективирттал личIи увну ур даврил шартIру дуруччаврил ялув ацIансса 1384 уполномоченный. Идарарттай зузиминнал захIматрал шартIру дуруччин лахьхьин бувну бур 16 880 инсаннан.
ЗахIматрал кьануннал актрайн бувну хьунадакьлакьисса диял дакъашивуртту дур, шартIру дакъасса кIанттурдай зузисса льготарду дусса инсантурал ихтиярду дуруччаврил ва компенсацияртту булаврил хIакъиравусса.
