Байбивхьунни захIматрал пишардал бяст-ччаллу

Февраль зурул 23-нний Дагъусттаннай байбивхьунни WorldSrkills Russia «Молодые профессионалы» тIисса региондалул VII-мур чемпионат.

Гьашинусса чемпионатрал пишардал усттаршиву кка­ккан дуллалисса бяст-ччаллу най бикIантIиссар, республикалул школарттай, колледжирттаву ва техникумирттаву дуклакисса, 16-22 шиннардил оьрчIал ва 10-16 шиннардил чIава жагьилтурал дянив. WorldSkills Russia стандартирттал тIалавшиннарайн бувсса 55 журасса пишалул усттаршиву ккаккан дуллалисса чемпионатрай гьуртту хьунтIиссар 300-ннийн бивсса жагьилсса пишакартал. Бяст-ччаллу най бикIантIиссар «Веб- технологии», «Графический дизайн», «Электромонтаж», «Туризм», «Разработка виртуальной и дополненной реальности» тIисса ва чIявусса цаймигу пишардал усттаршиву ккаккан давриву.
Чемпионатрал даву тIитI­латIисса мажлисрай ихтилат буллай, ДР-лул ХIукуматрал председательнал хъиривчув Мурад Казиевлул кIицI лавгунни WorldSkills Russia чемпионатрал даврил агьаммур мурад хъанахъишиву захIматрал пишарду машгьур баву ва пишакартурал бюхъулул даража гьаз баву.
«Республикалий гьашину ва чемпионат арулчинни дуллалисса. Вай бяст-ччаллаву гьуртту хъанахъисса жагьилсса пишакартурал аьдад ялу-ялун гьарза хъанай душиврийн бувну исват хьунни чемпионат тIалавну душиву. Му бакъассагу, чемпионат хъанахъиссар республикалул кадрардал потенциал хьхьичIунмай баву мурадрай­сса инвестициялул проектну. Ххарину ура жагьилтурал дянив захIматрал пишарду сийлий бушиврия. ХIакьинусса кьини чемпионатрал бяст-ччаллаву лавайсса даражалий пишардал усттаршиву ккаккан дуллай бур жула жагьилтал, лахьлай бур кувннацIа кувннан даврил опыт», – увкунни Мурад Казиевлул.
Хъирив, ихтилат бунни ДР-лул кIулшивуртту дулаврил министр ЯхIия Бучаевлул: «ДакI ххари хъанай дур жула республикалий чемпионат хъинну машгьурну душиврия. Ялу-ялун чIяву хъанай бур жагьилтурал дянивсса бюхъулул магьиршиву ккаккан дуллалисса захIматрал пишарду. Шикку, хьхьичIунсса пишакартал аьлтту баву ба­къассагу, предприятиярттай зунсса, даву кIулсса пишакартал кьамул бансса сант ххишала хъанай дур».
Чемпионатрал программалул лагрулий хьунтIиссар ряхва ккуркки стол, Республикалул колледжирттавусса ларай­сса технологияртту дусса мастерскойрттавунсса шанма экскурсия ва мастер-класс. Му ба­къассагу, хьунтIиссар вебинарду, онлайн-дискуссияртту. Тамашачитураща вай мероприятиярттал давривух гьуртту хьун бюхъайссар онлайн-режимрай.